Мыекъуапэ ирайон цIыкIухэу «Восходымрэ» «Михайлово» зыфиIорэмрэ аужырэ уахътэм хэпшIыкIэу зэхъокIыгъэх.
— АР-м и ЛIышъхьэу КъумпIыл Мурат, федеральнэ ыкIи шъолъыр хэбзэ къулыкъухэм яIэпыIэгъукIэ мыхэм кIэлэцIыкIу IыгъыпIакIэ, шэпхъэшIухэм адиштэрэ поликлиникэ яIэ хъугъэ, нэбгырэ 1100-мэ ателъытагъэу еджапIэ щытэшIы, щагухэр, гъогухэр тэгъэкIэжьых, зыгъэпсэфыпIэ чIыпIэхэр зэтетэгъэпсыхьэх, — къыIуагъ Мыекъопэ къэлэ администрацием ипащэу Геннадий Митрофановым.
Мы районхэм бэдзэршIыпIэу яIэм игъэкIэжьыни пшъэрылъ шъхьаIэхэм зэращыщым ащ къыкIигъэтхъыгъ. АР-м иминистрэхэм я Кабинет и Тхьаматэу КIэрэщэ Анзауррэ Геннадий Митрофановымрэ «Восходым» ибэдзэршIыпIэ иIоф тегу-щыIагъэх. Гъэстыныпхъэ шхъуантIэм икIуапIэу давлениешхо зиIэм тетыгъэ щапIэхэр мы уахътэм Iуахыжьых. IофшIэнхэр нахь агъэпсынкIэнхэшъ, чIыпIэм игъэкъэбзэн рагъэжьэщт, етIанэ ар зэтырагъэпсыхьащт.
ЩапIэхэр зиягъэхэм е зыгъэфедэщтыгъэхэм фэтэрыбэу зэхэт унэхэм ящагухэм сатыушIыпIэхэр ащагъэпсынхэу фитыныгъэ яI. Джащ фэдэу урамэу Батарейнэм щашIыгъэ бэдзэршIыпIэм щэпIэ чIыпIэхэр щаубытынхэ алъэкIыщт. Къэлэ администрацием иотделэу мы Iофхэм афэгъэзагъэм предпринимательхэм макъэ аригъэIугъ.
Геннадий Митрофановым къэлэдэсхэм Iэрыфэгъу щыIакIэ яIэным, Мыекъуапэ итеплъэ нахьышIум ылъэныкъокIэ зэхъокIыгъэ хъуным зэхэубытэгъэ екIолIакIэ иIэу зэрэдэлажьэхэрэм къыкIигъэтхъыгъ.
Мыекъопэ къэлэ администрацием ипресс-къулыкъу.