Лъэпкъ проектэу «ЗекIонымрэ хьакIэхэм дахэу апэгъокIыгъэнымрэ» зыфиIорэм къыдыхэлъытагъэу ыпкIэ лъамытэу кIэлэеджакIохэм зызэрарагъэгъэпсэфыщт программэм игъэцэкIэн гъэрекIо фежьагъэх.
А программэр зыщыпхыращырэ шъолъырхэм Адыгеири ащыщ.
ГъэрекIо иIоныгъо къыщыублагъэу ишэкIогъу мазэ нэс республикэм икIэлэеджэкIо 1300-м ехъоу я 5 — 9-рэ классхэм арысхэм загъэпсэфыгъ. Мыгъи кIэлэеджэкIо 1300-рэ фэдизмэ ащ фэдэ фэIо-фашIэр къызыфагъэфедэн алъэкIыщт. ЖъоныгъуакIэм и 29-м Мыекъуапэ щыщ кIэлэеджэкIо 250-мэ Мыекъопэ районымкIэ поселкэу Каменномостскэм зыщагъэпсэфынэу амал яIэщт.
Адыгэ Республикэм зекIонымрэ зыгъэпсэфыпIэхэмрэкIэ и Комитет къызэритыгъэмкIэ, зыгъэпсэфыгъо программэр зытетыгъэм тетэу къэнэжьыгъ. КIэлэеджакIохэр ыпкIэ лъамытэу зызщагъэпсэфыщт чIыпIэм нагъэсыщтых, ядэжьи къагъэзэжьыщт, агъэшхэщтых, зы экскурсиерэ мастер-классрэ афызэхащэщт. КIэлэеджакIохэм Хьаджэхъу ичIыпIэ дахэхэр зэрагъэлъэгъущтых.
«2023-рэ илъэсым мыщ фэдэ фэIо-фашIэхэр зыфызэхащэщтхэр кIэлэеджэкIо зэчыишIухэр, мобилизацием къыхиубытагъэхэм, сабыибэ зэрыс, гъот макIэ зиIэ унагъохэм якIэлэцIыкIухэр ары. ФэIо-фашIэр къафагъэцэкIэнымкIэ шапхъэу щыIэхэмрэ лъэIу тхылъыр зэрарахьылIэщт шIыкIэмрэ социальнэ фэIо-фашIэхэр зыгъэцэкIэрэ муниципальнэ гупчэхэм ащызэрагъэшIэн алъэкIыщт. Апэрэ купым дэгъоу зигъэпсэфынэу тыфэлъаIо, чIыпIэ туроператорхэм нахь чанэу программэм къыхэлэжьэнхэу тыкъяджэ», — къытыгъ Адыгэ Республикэм зекIонымрэ зыгъэпсэфыпIэхэмрэкIэ и Комитет.