Урысые физкультурэ-спорт комплексэу «IофшIэным ыкIи зыкъэухъумэжьыным сафэхьазыр» зыфиIорэм къыдыхэлъытэгъэ шапхъэхэм ятын шъухэлэжьэнэу шъурегъэблагъэ Мыекъуапэ физическэ культурэмкIэ ыкIи спортымкIэ и Комитет.
Мыщ епхыгъэ зичэзыу Iофтхьабзэр жъоныгъуакIэм и 29-м щегъэжьагъэу мэкъуогъум и 4-м нэс кIощт. Нэбгырэ пэпчъ тхьамафэм имэфэ гъэнэфагъэ къыхихынышъ, ифизическэ ухьазырыныгъэ ыуплъэкIун ылъэкIыщт. Ушэтынхэм ахэлажьэхэрэр аныбжь елъытыгъэу зэтеутыгъэх.
Урысыем и Президентэу Владимир Путиным иунашъокIэ 2014-рэ илъэсым спорт комплексэу «IофшIэным ыкIи зыкъэухъумэжьыным сафэхьазыр» зыфиIорэм иIофшIэн ригъэжьэжьыгъ. Шапхъэхэр зэрифэшъуашэу зытыхэрэм дышъэ, тыжьын ыкIи джэрз бгъэхалъхьэхэр аратых.
Iофтхьабзэм шъухэлэжьэным фэшI сайтэу «www.gto.ru» зыфиIорэм зыщышъутхын, нэужым номер гъэнэфагъэ къышъуатын фае. Ащ ыуж шапхъэхэр шъутыным шъузэрэфэхьазырыр къэзыушыхьатырэ лъэIу тхылъыр сайтэу «www.orgeo.ru» зыфиIорэмкIэ къэшъутын, джащ фэдэу шъуипсауныгъэ шапхъэхэм зэрадиштэрэр зэрытхэгъэ медицинэ тхьапэр зыдэшъуIыгъын фае. Нахь игъэкIотыгъэ къэбар ижъугъотэщт социальнэ хъытыоу «Вконтакте» зыфиIорэм зэхэщакIохэм официальнэ нэкIубгъоу къыщызэIухыгъэм.