Республикэм иеджапIэхэр къэзыухыхэрэм аужырэ одыджыныр къафытеуагъ. Мы мэфэкI мафэм линейкэу ахэм ащыкIуагъэхэм кIэлэ ыкIи пшъэшъэ мини 7 ахэтыгъ. Ахэр я 9-рэ ыкIи я 11-рэ классхэр къэзыухыгъэхэу щыIэкIакIэм апэрэ лъэбэкъур хэзыдзэщтхэр ары.
СилъапIэхэу еджапIэхэр къэзыухыхэрэр! Сыгу къыздеIэу сышъуфэгушIо щыIэныгъэм ичэзыукIэ шъузэрэхахьэрэм пае. Шъуапэ къэралыгъо ушэтынхэр илъых, еджапIэхэм шъуачIэхьащт, сэнэхьатхэр шъуIэ къижъугъэхьащтых. ЕджапIэм шъучIэсыфэ шIэныгъэу ыкIи къулайныгъэу шъуIэ къижъугъэхьагъэхэр нэбгырэ пэпчъ къызфигъэфедэжьынхэ ылъэкIынэу, гъогоу хэшъухыгъэм зэрифэшъуашэм тетэу шъурыкIонэу сышъуфэлъаIо. ШъуикIэлэегъаджэхэр зыщышъумыгъэгъупшэх, кIэм зыфэжъугъас, сэнэхьатэу къыхэшъухыщтымкIэ къулайныгъэхэр шъуIэ къижъугъахьэх, лъэгэпIакIэхэм шъуафакIу!
ЕджапIэм ыуж гъэсэныгъэ дэгъу зэжъугъэгъотыным пае республикэм амалышIухэр иIэх: апшъэрэ къэралыгъо еджэпIитIу, техникумхэу ыкIи колледжхэу сэнэхьатипшI пчъагъэ къыдэзылъытэхэрэр тиIэх. Республикэм иорганизациехэу гъэсэныгъэ зыщарагъэгъотыхэрэм лекциехэр ыкIи семинархэр, научнэ конференциехэр, факультативхэр, форумхэр, творческэ ыкIи нэмыкI лъэныкъохэм япхыгъэ Iофтхьабзэхэр, общественнэ щыIэкIэ гъэшIэгъон къащышъожэх.
Адыгеим иныбжьыкIэхэр ары республикэми тихэгъэгуи янеущырэ мафэ зыфэдэщтыр зэлъытыгъэр. Шъуащыщ пэпчъ специалист дэгъу зэрэхъущтым, Iофэу зыфэгъэзагъэм икъулайныгъэхэр дэгъоу ыIэ къызэрэригъэхьащтхэм, тиреспубликэ ищытхъу чыжьэу зэригъэIущтым, ащ игъэхъагъэхэм джыри нахь зэрахигъэхъощтым, зэдытиунэу щытыр къызэриухъумэщтым сицыхьэ телъ.
Гъэхъагъэхэр шъушIынхэу шъуфэсэIо, гъогу мафэ шъутехь!
АР-м и ЛIышъхьэу КъумпIыл Мурат