Мыекъопэ районым щыпсэухэрэм ясоциальнэ хъытыухэм къарагъэхьагъэх ошъушхоу щыIагъэм икIэуххэм япхыгъэ сурэтхэр.
Ошъу къемыхынымкIэ къулыкъум Iоф ышIагъэ нахь ышIэми, гумэкIыгъор щыIагъ. Джыри ошъу къехын зэрилъэкIыщтым ухъумакIохэм цIыфхэм анаIэ тырарагъадзэ.
Федеральнэ къэралыгъо бюджет учреждениеу «Темыр-Кавказ УГМС-м» къызэритыгъэмкIэ, жъоныгъуакIэм и 23-р екIыфэ, джащ фэдэу жъоныгъуакIэм и 24-м ыкIи и 25-м республикэм ощхышхо къыщещхыщт, шыблэр гъогъощт, ошъу къехыщт, жьыбгъэр такъикъым метрэ 20 — 22-рэ фэдиз илъэшыгъэу къепщэщт.
Урысыем ошIэ-дэмышIэ IофхэмкIэ и Министерствэ и ГъэIорышIэпIэ шъхьаIэу Адыгэ Республикэм щыIэм цIыфхэм теубытагъэ хэлъэу игъо афелъэгъу шъхьаныгъупчъэхэр фашIынхэу, автомобильхэр гаражхэм ачIагъэуцонхэу, чъыгхэм апэчыжьэу ахэр агъэуцунхэу, рекламэхэр зытет пкъыгъохэм ащаухьанэу. Джащ фэдэу шыблэр зыщыгъогъорэ лъэхъаным электричествэр зэрыкIохэрэм, антеннэхэм апэчыжьэнхэу, телефонхэр, сотовэхэри зэ-рахэтхэу, электричествэмкIэ Iоф зышIэрэ пкъыгъо зэфэшъхьафхэр амыгъэфедэнхэу.
Адыгеим мэкъу-мэщымкIэ и Министерствэ гумэкIыгъом епхыгъэу чIыгулэжьхэм ашIэн фаехэм афэгъэхьы-гъэу къытыгъ. Министрэу Къуанэ Ан-заур республикэм ичIыгулэжьхэм къяджагъ мэкъумэщ страхованиемкIэ программэм нахь чанэу хэлэжьэнхэу, чIэнагъэу ашIырэм ипроцент 80-м нэс къэралыгъом къафилъэгъужьын зэрилъэкIыщтым иамалхэри алъигъэIэсыгъэх.
Шъугу къэтэгъэкIыжьы: мэлылъфэгъум ыкIэхэм адэжь республикэм ошъушхоу щыкIуагъэм къыхэкIэу коц гектар 736-мэ, рапс гектар 486-мэ, хьэ гектар 40-мэ, зэнтхъ гектар 15-мэ, илъэсыбэрэ къэкIынхэм фытегъэпсыхьагъэхэр зыщахалъхьэгъэ гектар 822,9-мэ зэрар ахьыгъ.