Неущ Адыгеим ит еджапIэхэм аужырэ одыджыныр къащытео. Мы илъэсым я 9-рэ классыр къэзыухыхэрэм япчъагъэ нэбгырэ 5307-рэ, я 11-м къычIэкIыхэрэр 1699-рэ мэхъух.
Непэрэ мафэр зищыIэныгъэкIэ мэхьанэшхо зиIэхэм ыкIи ушэтынхэм апхырыкIынхэу къызпыщылъхэм къафэгушIуагъ АР-м и ЛIышъхьэу КъумпIыл Мурат:
«ЕджапIэм къычIэкIыхэрэм ушэтынхэр щытхъу хэлъэу къызэранэкIынхэу, нэмыкI еджэкIо пстэуми гъэмэфэ зыгъэпсэфыгъо тхъагъо къякIунэу афэсэIо! Тэ а уахътэм къыкIоцI еджэгъу илъэсыкIэм еджапIэхэр фэдгъэхьазырыщтых».
Зыгъэпсэфыгъо уахътэр макIофэ ЛIышъхьэм къызэрэхигъэщыгъэмкIэ, агъэнэфэгъэгъэ гъэцэкIэжьынхэм адакIоу еджапIэхэм яигъэкIотыгъэ зэтегъэпсыхьани лъагъэкIуатэ. Ар урысые политическэ партиеу «Единэ Россием» къыпкъырыкIыгъэу, Урысыем и Президентэу Владимир Путиным зыдыригъэштагъэу щыт.
«Илъэситфым ателъытэгъэ къэралыгъо программэр шIуагъэ къытэу гъэфедэгъэным тыпылъ. ИкIыгъэ илъэсым еджэпIи 9-мэ игъэкIотыгъэ гъэцэкIэжьынхэр ащытшIыгъэх, мыгъэ джыри 7 тэгъэцэкIэжьы», — къыхьыгъ щысэхэр КъумпIыл Мурат.
IофшIэнхэр зэрэкIохэрэм ЛIышъхьэм ежь ышъхьэкIэ ынаIэ тырегъэты. Зыуж ихьэгъэхэ псэуалъэ пэпчъ игъэцэкIэжьын игъом аухыныр ыкIи шэпхъэшIухэм адиштэн фаеу пшъэрылъ щыт. Адыгеим иеджапIэхэу анахьыбэмкIэ агъэцэкIэжьышъущтхэм фэдиз программэм къыдыхилъытэу агъэкIэжьынхэу ары агъэнафэрэр.
Адыгеим и ЛIышъхьэ къызэрэхигъэщыгъэмкIэ, къэблэгъэрэ илъэситIум къакIоцI республикэм иеджэпIэ 50 фэдиз агъэцэкIэжьыщт. «Мыщ дэжьым мэхьанэшхо иI еджапIэхэр зэрэдгъэкIэжьыхэрэм имызакъоу, щыIэныгъэм иаужырэ шапхъэхэм гъэсэныгъэр ахэм ащызэхэщэгъэнхэм. Джащ фэдэ пшъэрылъхэр афэсшIыгъэх АР-м гъэсэныгъэмрэ шIэныгъэмрэкIэ и Министерстви, муниципальнэ псэупIэхэм япащэхэми», — къыкIигъэтхъыгъ КъумпIыл Мурат.
ЕджэпIакIэхэм яшIыни джащ фэдэу лъагъэкIуатэ. Мы илъэсым Тэхъутэмыкъое районым щы (чIыпIэ 2450-мэ ателъытагъэу), къихьащт илъэсми щы (чIыпIэ 2450-мэ ателъытагъэу)Мыекъуапэ, Тэхъутэмыкъое ыкIи Мыекъопэ районхэм ащашIыщт.
АР-м и ЛIышъхьэ ипресс-къулыкъу
Сурэтхэр: А. Гусев