Афыпсыпэ къоджэ псэупIэм хахьэх чылэхэу Афыпсыпэ, Пэнэхэс, Псэйтыку, Хьащтыку, поселкэу Кубаньстроир. Ахэм зэкIэмкIи нэбгырэ 5270-рэ адэс, унэе псэупIэхэм ыкIи фэтэрхэм япчъагъэ 657-рэ мэхъу.
Адыгеим ит псэупIэхэм афэдэу Афыпсыпэ къоджэ псэупIэм гъэхъагъэхэр ышIызэ ыпэкIэ лъэкIуатэ, къэралыгъо ыкIи республикэ программэхэм ахэлажьэ, социальнэ мэхьанэ зиIэ учреждениехэр щашIых, щагъэцэкIэжьых. Джащ фэдэу къоджэдэсхэм яунагъохэр зэраIыгъыщтхэм, зэрагъэшхэщтхэм пылъых, къэралыгъо IэпыIэгъур къызфагъэфедэзэ унэе IофшIапIэхэр къызэIуахых, мэкъумэщ программэхэм ахэлажьэх, грантхэр къаратых.
Афыпсыпэ къоджэ псэупIэм ипащэ игуадзэу Жанэ Заирэ къызэрэтиIуагъэмкIэ, къуаджэу Псэйтыку культурэм и Унэ дэтыгъэп. Лъэпкъ проектэу «Культурная среда» зыфиIорэм хэлажьэхи, чIыпIэ 222-м тегъэпсыхьагъэу унакIэ афагъэпсыгъ. Ащ нэмыкIэу «Iэрыфэгъу къэлэ щыIакIэр гъэпсыгъэныр» зыфиIорэ программэм хахьэу Псэйтыку кIэлэцIыкIу площадкэ щашIыгъ, ар къашIыхьагъ ыкIи псыр ращэлIагъ. Джащ фэдэу федеральнэ программэу «Яхэгъэгу къаухъумэзэ хэкIодагъэхэм яшIэжь саугъэт» зыфиIоу 2019 — 2024-рэ илъэсхэм ателъытагъэм хахьэу мы къуаджэм дэт саугъэтыр агъэкIэжьыгъ.
Къуаджэу Хьащтыку культурэм и Унэу дэтыгъэр жъы дэдэ хъугъагъэ, ыпшъэкIэ зигугъу къэтшIыгъэ лъэпкъ проектым хахьэу мыщи гъэцэкIэжьынышхохэр рашIылIагъэх. Непэрэ щыIэкIакIэм диштэу ар зэтырагъэпсыхьагъ, Iэмэ-псымакIэхэр чIагъэуцуагъэх. Джащ фэдэу унэр къашIыхьагъ, щагум плиткэ далъхьагъ. Ащ нэмыкIэу лъэпкъ проектэу «Псауныгъ» зыфиIорэм хахьэу Хьащтыку фельдшер-мамыку IэзапIэ щагъэпсыгъ.
Афыпсыпэ къоджэ коир къэзыгъэдахэхэрэм ыкIи къоджэдэсхэр зэрыгушхохэрэм ащыщ паркэу «Шапсыгъ» зыфаусыгъэр. Лъэпкъ проектым ишIуагъэкIэ ари агъэпсыгъ.
— Проектым тызыхэлажьэм федеральнэ ахъщэу сомэ миллиони 4, 5-рэ къытатыгъ. Тэхъутэмыкъое район администрацием ыкIи Афыпсыпэ къоджэ псэупIэм ябюджет ахъщэу сомэ миллион фэдиз къыхагъахъуи, паркыр агъэпсыгъ, ащ нэмыкIэу лъэсрыкIуапIэр, лъэмыдж цIыкIур ашIыгъ, нэфынэр къэзы-тырэ пкъыгъохэр дагъэуцуагъэх. Ащ ыуж шIушIакIоу Шъэумэн Хьазрэт сомэ миллиони 3 къытити, паркым чъыгхэр, къэгъагъэхэр дагъэтIысхьагъэх. КIэлэцIыкIухэм якIасэу мы чIыпIэм къэкIох, еджэпIэ ужым зыщагъэпсэфы. Ащ нэмыкIэу Афыпсыпэ дэт культурэм и Унэу жъы дэдэ хъугъагъэр Хь. Шъэумэным имылъкукIэ агъэцэкIэжьыгъ ыкIи чIэтын фаер зэкIэ кIэу чIагъэуцуагъэх, — къыIуагъ Заирэ.
Афыпсыпэ къоджэ псэупIэм ипащэ игуадзэ къызэриIуагъэмкIэ, якъоджэгъоу Шъэумэн Хьазрэт ренэу ишIогъэшхо къарегъэкIы, ащкIэ цIыфхэр лъэшэу фэразэх. ГъэрекIо ащ имылъкукIэ
Пэнэхэс дэт еджапIэм ишхапIэ игъэкIотыгъэ гъэцэкIэжьынхэр рашIылIагъэх. Ащ нэмыкIэу Шъэумэн Хьазрэт мылъку IэпыIэгъоу къаритыгъэмкIэ Афыпсыпэ гурыт еджапIэм имузей гъэцэкIэжьынхэр рашIылIагъэх. Мы мафэхэм ежь имылъкукIэ аригъэшIыгъэ «Я 21-рэ лIэшIэгъум иклиник» зыфиIорэм гъэцэкIэжьынышхохэр щэкIо, медицинэ Iэмэ-псымакIэхэр чIагъэуцох.
Афыпсыпэ къоджэ коим щыпсэухэрэм зэкIэми гъэстыныпхъэ шхъуантIэр, псыр яIэх, ащкIэ гумэкIыгъо щыIэп. Социальнэ IофышIэхэр нэжъ-Iужъхэм адэжь кIохэзэ IэпыIэгъу арагъэгъоты.
Заирэ къызэриIуагъэмкIэ, тапэкIэ гухэлъэу яIэхэм ащыщ проектэу «Псы къабз» зыфиIорэм хэлэжьэнхэу, мы мафэхэм ащ ыуж итых. Ащ нэмыкIэу чIыпIэ мэхьанэ зиIэ гъогухэм ягъэцэкIэжьын хахьэу Шъэумэным ыцIэ зыхьырэ урамыр зэтырагъэпсыхьагъ, мылъкоу яIэм елъытыгъэу нэмыкI лъэныкъохэри янэплъэгъу рагъэкIыхэрэп.
КIАРЭ Фатим.