Лъэпкъ проектэу «Культурэмрэ» Адыгэ Республикэм икъэралыгъо программэу «Культурэм ихэхъоныгъ» зыфиIорэмрэ адиштэу академическэ музыкэм ишъолъыр фестиваль жъоныгъуакIэм и 18 — 19-м Адыгеим щыкIуагъ.
Iофтхьабзэр зэхащагъ Адыгэ Республикэм культурэмкIэ и Министерствэрэ «Концертное объединение Республики Адыгея» зыфиIорэмрэ. Ар зэрэкIуагъэр филармонием и Rutube-каналрэ порталэу PRO.Культура. РФ зыфиIорэмрэ занкIэу къагъэлъэгъуагъ.
Фестивалым пшъэрылъэу иIагъэр хэгъэгу ыкIи лъэпкъ искусствэр къызэтегъэнэгъэным, тапэкIэ хэхъоныгъэхэр егъэшIыгъэным, цIыфхэр академическэ искусствэм нэIуасэ фашIыхэзэ нахь зэпэблагъэ хъунхэм, зэлъашIэгъэ композиторышхохэм афэшъхьафэу музыкант ныбжьыкIэхэми нэIуасэ афашIынхэр ары.
Филармонием изал цIыфхэр чIизыгъ, музыкэр шIу зылъэгъурэ пстэури ащ къычIэхьанхэ фитыгъ. Концертэу къатыгъэм Адыгэ Республикэм исимфоническэ оркестрэ композитор цIэрыIохэу Л. Бетховеным, П. Чайковскэм япроизведениехэм цIыфхэр щарагъэдэIугъэх. Концерт программэм идирижерыгъэр Санкт-Петербург щыпсэурэ музыкант ныбжьыкIэу Ашамаз Заифовыр, солистыр Московскэ къэралыгъо консерваториеу П. Чайковскэм ыцIэ зыхьырэм истудентэу, я 4-рэ курсым щеджэрэ Амина Кясовар (фортепиано) ары. ТIуми Къэбэртэе-Бэлъкъар Республикэр ары пэублэ музыкальнэ гъэсэныгъэ зыщызэрагъэгъотыгъэр, нэужым консерваториехэм ащеджагъэх. ЗэрэныбжьыкIэхэм емылъытыгъэу Урысыем ишъолъырхэм концертхэр къащатыгъэх, ятворчествэ зыгу рихьыхэрэм ренэу къахэхъо.
Адыгэ Республикэм икъэралыгъо симфоническэ оркестрэрэ солист-вокалистхэмрэ зэлъашIэрэ композиторхэу В. А. Моцарт, Дж. Верди, И. Кальман, М. Мусоргскэм, А. Бородиным, С. В. Рахманиновым, И. Штраус, И. Дунаевскэм, нэмыкIхэми яоперэхэмрэ опереттэхэмрэ ащыщ пычыгъохэм цIыфхэр рагъэдэIугъэх. Джащ фэдэу фестивалым хэлэжьагъэх Адыгэ Республикэм иконцерт объединение иартист-вокалистэу Дарья Умбинар, Краснодарскэ творческэ объединениеу «Премьера» зыфиIорэм имузыкальнэ театрэ исолистэу Владимир Емелиныр.
Фестивалыр мэфитIо кIуагъэ. Музыкантхэм афэшъхьафэу ащ Адыгэ республикэ ныбжьыкIэ тхылъеджапIэм къыгъэхьазырыгъэ къэгъэлъэгъонэу адыгэ мэкъамэхэмрэ ижъырэ музыкальнэ Iэмэ-псымэхэмрэ афэгъэхьыгъэм цIыфхэр щеплъыгъэх. Адыгэ композиторхэм ятворчествэ агу къагъэкIыжьыгъ, лъэпкъым имузыкальнэ искусствэ лъапсэ фэзышIыгъэхэм ясурэтхэр къэгъэлъэгъоным къыщагъэлъэгъуагъэх.
Шъаукъо Аслъангуащ.