«ЗэикI ыкIи адыгэ филологием иIофыгъо шъхьаIэхэр» зыфиIорэ Дунэе симпозиумыр Адыгэ къэралыгъо университетым непэ къыщызэIуахыгъ.
Адыгэ бзэшIэныгъэмкIэ еджапIэм иапэрэ зэхэщакIоу КIэрэщэ Зэйнаб Ибрахьимэ ыпхъур къызыхъугъэр илъэси 100 зэрэхъугъэм фэгъэхьыгъэ симпозиумым Урысыем ыкIи IэкIыб къэралхэм къарыкIыгъэхэу ныдэлъфыбзэмкIэ ушэтэкIо ыкIи шIэныгъэлэжь нэбгыри 120-рэ хэлэжьагъ.КIэрэщэ Зэйнаб (1923 — 1998-рэ илъ.) советскэ ыкIи урысые бзэшIэныгъэлэжь, кавказовед ыкIи общественнэ IофышI. АдыгеимкIэ филологие шIэныгъэхэмкIэ докторыцIэр къэзгъэшъыпкъэжьыгъэ апэрэ бзылъфыгъ (1969-рэ илъэс), профессор (1970-рэ илъэс), шIэныгъэхэмкIэ РСФСР-м (1982-рэ илъэс) ыкIи Адыгеим (1993-рэ илъэс) язаслуженнэ IофышIэшху. БзэшIэныгъэм иIофыгъуабэхэр ыушэтыгъэх ыкIи зэхифыгъэх, адыгабзэм играмматикэ къытхыхьагъ, адыгабзэм имызакъоу кавказ бзэшIэныгъэм Iахьышхоу хэуцуагъэхэу «Адыгабзэм изэхэф гущыIалъэ» ыкIи «Адыгабзэм играмматикэ» зэхэзгъэуцуагъэхэм ахэтыгъ. 
Адыгэ къэралыгъо университетым иректорэу Мамый Даутэ, АР-м гъэсэныгъэмкIэ ыкIи шIэныгъэмкIэ иминистрэ иIэнатIэ зыгъэцакIэу Евгений Лебедевыр, Абхъазым, Адыгеим, Къэбэртэе- Бэлъкъарым, Къалмыкъ Республикэм, Къэрэщэе-Щэрджэсым, Москва бзэшIэныгъэмкIэ ягупчэ пэрытхэм яшIэныгъэлэжьхэр симпозиумым икъызэIухын хэлэжьагъэх.
Iофтхьабзэм ишIэныгъэ программэ пленарнэ зэхэсыгъомрэ Iофыгъохэм зыщатегущыIэщтхэ едзыгъуитфырэ хагъэхьагъэх. Лъэпкъ цIыкIухэм яныдэлъфыбзэхэм якъэухъумэн ыкIи яхэгъэхъон япхыгъэ Iофтхьабзэхэм дунаим зэращыдэлажьэхэрэм игъэкIотыгъэу зэхахьэм щытегущыIагъэх. 
Ныдэлъфыбзэхэм, бзитIу зэдэпшIэным япхыгъэ ушэтынхэм, ныдэлъфыбзэхэр зэгъэшIэгъэнымкIэ щыIэ шIыкIэ-амалыкIэхэм, нэмыкIэу непэрэ мафэм диштэрэ шIэныгъэ шапхъэхэм ягъэфедэн симпозиумым щыхэплъагъэх. Зэхэсыгъохэр зэрэкIуагъэхэм фэгъэхьыгъэ къэбар игъэкIотыгъэ тикъыкIэлъыкIорэ къыдэкIыгъо итыщт.