Хэгъэгу зэошхом ТекIоныгъэр къызщыдахыгъэр илъэс 78-рэ зэрэхъугъэм фэгъэхьыгъэ зэнэкъокъоу «Зарница» зыфиIорэр Адыгэ республикэ гимназием щыкIуагъ.
Пэублэм гимныр къырагъаIозэ, Урысыем ыкIи Адыгеим ябыракъхэр кIэлэеджакIохэу ХъокIо Батыррэ Амурэ Адамрэ даIэтэягъэх.
Iофтхьабзэр къызэIуихыгъ Адыгэ республикэ гимназием ипащэу КIыкI Нуриет.
— ТекIоныгъэм и Мафэ ехъулIэу Iофтхьэбзэ зэфэшъхьафхэр илъэс къэс зэхэтэщэх. Мы мэфэкIым имэхьанэ нэбгырэ пэпчъ къыгурыIон фае, тинахьыжъхэр апсэ емыблэжьхэу пыим ебэныгъэх, текIоныгъэм фэбэнагъэх. Ахэм яшIэжь дгъэкIоды хъущтэп. МэфэкIэу къэблагъэрэмкIэ сышъуфэгушIо, тидунай мамырэу, тиуашъо къаргъоу тыпсэунэу шъуфэсэIо, — къыIуагъ КIыкI Нуриет.
Iофтхьабзэм икъызэIухын хэлэжьагъ «лIыхъужъныгъэм иурок» илъэс пчъагъэ хъугъэу языгъэхьырэ, авиационнэ полкым икомандирэу, полковникэу Анатолий Маматовыр. Яхэгъэгу шIу алъэгъунэу, лIыхъужъныгъэ ахэлъынэу ыкIи ятарихъ ащымыгъупшэнэу ныбжьыкIэхэм ащ закъыфигъэзагъ.
«Зарницэм» я 5-рэ классым къыщегъэжьагъэу я 11-м нэс ащеджэхэрэр хэлэжьагъэх, зэкIэмкIи Iофтхьабзэм нэбгырэ 600 фэдиз къекIолIагъ, ахэр лъэныкъо зэфэшъхьафхэмкIэ зэнэкъокъугъэх.
— Непэрэ Iофтхьабзэм пшъэрылъ шъхьаIэу иIэр кIэлэцIыкIухэм ыкIи Iэтахъохэм яхэгъэгу шIу алъэгъоу пIугъэнхэр, тикъэралыгъо итарихъ ашIэныр, Хэгъэгу зэошхом иветеранхэм ыкIи зэо кIыбым Iоф щызышIагъэхэм шъхьэкIафэ афашIыныр ары.
Орэд къэIонымкIэ, спорт зэнэкъокъухэмкIэ, уIагъэ зытелъыр зэрэзепхьащтымкIэ, нэмыкIхэмкIэ кIэлэеджакIохэм заушэтыгъ, анахь дэгъухэр къэнэфэщтых. Ны-тыхэми, кIэлэегъаджэхэми, кIэлэеджакIохэми зэгурыIоныгъэ тиIэу мыщ фэдэ Iофтхьабзэхэм зафэтэгъэхьазыры, зэхэтэщэх. Мы мэфэкIым мэхьанэу иIэр ныбжьыкIэхэм къагурэIо. Заом фэгъэхьыгъэ орэдэу къаIощтхэр, ащыгъыщтхэр ежь-ежьырэу къыхахыгъэх, — къыIуагъ гимназием изавучэу Уджыхъу Аннэ.
ДЕЛЭКЪО Анет.
Сурэтыр Iэшъынэ Аслъан тырихыгъ.