ЖъоныгъокIэ зыгъэпсэфыгъо мафэхэр мыгъэрэ илъэсым изекIо уахътэ икъызэIухын ублапIэ фэхъугъэх.
БлэкIыгъэ гъэмафэм къыгъэнэфагъ зекIохэм яшIоигъоныгъэхэр, яамалхэр зэрэзэблэхъугъэхэр — хэгъэгум ишъолъырхэр ахэм нахь якIуапIэ хъугъэх. Зыщагъэпсэфынэу щылэ мазэмрэ жъоныгъуакIэмрэ тишъолъыр къихьэрэ цIыфхэм япчъагъэ зэрэбэм фэдэу, гъэмэфэ мэзищыми республикэм къакIохэрэм япчъагъэ къыщыкIэрэп. ЖъоныгъокIэ мэфэкIхэм гъэрекIо Мыекъопэ районым зекIо мин 35-рэ фэдиз къихьэгъагъ, мыгъи ащ къыщымыкIагъэу алъытэ.
АР-м зекIонымкIэ ыкIи зыгъэпсэфыпIэ чIыпIэхэмкIэ и Комитет итхьаматэ игуадзэу Джарымэ Бэлэ тызэрэщигъэгъозагъэмкIэ, 2022-рэ илъэсым щыублагъэу лъэпкъ проектэу «ЗекIоныр ыкIи хьэкIэ пэгъокIыным ииндустрие» зыфиIорэм епхыгъэ Iофтхьабзэхэр Адыгеим щагъэцакIэх. Ахэр АР-м икъэралыгъо программэу «ЗекIоным ихэхъоныгъ» зыфиIорэм къыхеубытэх. 2024-рэ илъэсым нэс ар агъэцэкIэщт. ЗыгъэпсэфыпIэу «Лэгъонакъэ» къызэIухыгъэ хъуным пае ищыкIэгъэ инфраструктурэм ипхырыщын 2023рэ илъэсым лъагъэкIотэщт. ГущыIэм пае, зекIо инфраструктурэм хэхъоныгъэ егъэшIыгъэнымкIэ проект 34-мэ къэралыгъо IэпыIэгъур гъэрекIо къырахыгъ. Модульнэ хьакIэщхэм яшIынкIэ проектхэм язэнэкъокъуи Адыгеир хэлажьэ ыкIи а лъэныкъомкIи къэралыгъо IэпыIэгъум щэгугъы. ХэгъэунэфыкIыгъэн фае я 5 — 9-рэ классхэм ащеджэхэрэр яхэку ичIыопс, итарихъ нахь дэгъоу щыгъозэнхэм пае ыпкIэ зыхэмылъ зекIо гъогухэр республикэм зэрэщызэхащэхэрэр. ЗекIо паркэу «Дахъо игъэхъун» зыфиIорэм ищыкIэгъэ гъогу ыкIи инженернэ къэкIуапIэхэр ещэлIэгъэнхэм епхыгъэ Iофтхьабзэхэр 2023-рэ илъэсым лъыкIотэщтых. Республикэм ичIыгу Iахьхэу инвестиционнэ программэхэм ахэуцощтхэм ягъэнэфэн Комитетым зэшIуехы.
Дахъо пэблагъэу къыпэIулъ ДжэгокIо гъэхъунэм щашIыщт зекIо комплексым, зэзэгъыныгъэу ашIыгъэхэм адиштэу, гъэстыныпхъэ шхъуантIэм ыкIи электроэнергием якъэкIуапIэхэр ращалIэх. ЗыгъэпсэфыпIэр
федеральнэ гъогум езыпхыщт лъэмыджхэм яшIын мы илъэсым аублэщт. IофшIэнхэр 2024-рэ илъэсым нэс зэшIуахыщтых.
Адыгеим изекIо гъогухэм ахэхъо. КIэхэр реестрэм хэгъэхьэгъэнхэм епхыгъэ IофшIэнхэр зэпымыоу лъэкIуатэх. Мыекъуапэ итарихъ чIыпIэхэм нэIуасэ уафэзышIырэ экскурсие зекIо гъогухэр гъэрекIо ащ хагъэхьагъэх. «Евгений Шварц и Мыекъуап» зыфиIорэр ахэм зэу ащыщ. ЗекIо гъогукIэхэу къыхагъэщыхэрэм Комитетым щыхэплъэнхэу фэхьазырых. Ахэм адырагъэштагъэ хъумэ, зекIо операторхэм ядэкIыгъохэм ахагъэуцощтых.
Тэу Замир.