Е. А. Погореловым ишIэжь фэгъэхьыгъэ Урысые зэнэкъокъухэр къалэу Волгоград щыкIуагъэх.
Адыгеим идзюдоистхэм дэгъоу зыкъагъэлъэгъуагъ, гъэхъэгъэшIухэр ашIыгъэх. Iофтхьабзэр я 17-у зэхащагъ.
Москва, Санкт-Петербург, Краснодар краим, Оренбургскэ, Ставрополь, Саратов, Астраханскэ, Челябинскэ, Тюменскэ, Тульскэ, Ростов, Самарскэ, Курганскэ ыкIи Орловскэ хэкухэм,
Къэбэртэе-Бэлъкъарым, Темыр Осетием, Дагъыстан, Ингушетием, Къэрэщэе-Щэрджэсым яспортсменхэм заушэтыгъ. ЗэкIэмкIи нэбгырэ 260-рэ хъущтыгъэх: хъулъфы-
гъи 189-рэ ыкIи бзылъфыгъэ 71-рэ.
— ЗэлъашIэрэ дзюдоистэу Евгений Погореловым ишIэжь фэгъэхьыгъэ турнирыр апэрэ илъэсэп зэрэзэхатщэрэр. Ау мыщ къекIолIэгъэ спортсменхэм япчъагъэ мыгъэ хэпшIыкIэу нахьыбэ хъугъэ ыкIи къалэу Кемеровэ щыкIощт Урысыем ичемпионат хэлэжьэщтхэм яхэшыпыкIын едзыгъо хъугъэ, — къыIуагъ Урысыем дзюдомкIэ
и федерацие ипрезидентэу Сергей Соловейчик.
Адыгеим икомандэ хъулъфыгъэ 12 ыкIи бзылъфыгъи 6 хэтыгъ. Ахэм медали 6 къахьыгъ. Ящэнэрэ чIыпIэхэр къыдахыгъэх Еутых Рэмэзан, ТхьакIущынэ Ахьмэд, ХьакIэко Данэ. ЯтIонэрэ хъугъэх Владимир Ингушевыр ыкIи Мыгу Миланэ. Дышъэ медалыр къэзыхьыгъэр Датхъужъ Алый.
ХагъэунэфыкIырэ чIыпIэхэр къыдэзыхыгъэхэм шIухьафтынхэр зэрафагъэшъошагъэхэм дакIоу сомэ мини 10-м щегъэжьагъэу мин 30-м нэс аратыгъ.
БЗЭШIУ Асхьад.