Адыгеим культурэмкIэ иучреждениехэм язытет игъорыгъозэ нахьышIу ашIы. Лъэпкъ проектэу «Культурэм» къыдыхэлъытагъэу концерт залэу «Налмэсым» игъэкIэжьын мыгъэ рагъэжьагъ.
2024-рэ илъэсым ыкIэм нэс IофшIэнхэр лъагъэкIотэщтых. А уахътэм къыкIоцI джырэ шапхъэхэм адиштэу унэр зэтырагъэпсыхьащт: унашъхьэр, инженер коммуникациехэр, кондиционерхэр зэблахъущтых, ыкIыбкIи, ыкIоцIкIи ар агъэдэхэщт. Зал шъхьаIэми, камернэ залми яоборудованиерэ ямебельрэ агъэкIэжьыщтых.
— Адыгеим иконцерткъэтыпIэ шъхьаIэхэм ащыщыр, зэлъашIэрэ ансамблэу «Налмэсым» исценэ джырэ шапхъэхэм адиштэу зэтегъэпсыхьэгъэнхэмкIэ, артистхэмкIи, цIыфхэмкIи гуIэтыпIэу ахэр щытынхэмкIэ ищыкIэгъэ амалхэр зетхьащтых. Унэм къыпэIулъ чIыпIэм изэтегъэпсыхьанкIэ, куандэхэмрэ къэгъагъэхэмрэ ащ щыгъэтIысхьэгъэнхэмкIэ пшъэрылъ гъэнэфагъэ- хэр афэсшIыгъэх, — къыIуагъ Адыгэ Республикэм и ЛIышъхьэ.
Мы аужырэ илъэси 5-м къыкIоцI культурэм и Унэ 57-рэ республикэм щагъэпсыгъ е щагъэцэкIэжьыгъ, искусствэхэмкIэ еджэпIи 7 щагъэкIэжьыгъ. ИскусствэхэмкIэ еджапIэу Ханскэм дэтымрэ искусствэхэмкIэ Мыекъопэ кIэлэцIыкIу еджапIэу N 6-мрэ ягъэкIэжьын мыгъэ аухыщт. Культурэм и Уни 3 къуаджэхэм ащагъэцэкIэжьынэу рахъухьэ. Культурэм иучреждениитIумэ ягъэпсын фежьэщтых. Джащ фэдэу креативнэ индустриемкIэ еджэпIитIу зэхащэщт.