Проектэу «Культурэр еджакIохэм апай» зыфиIорэм тегъэпсыхьагъэу Урысые Iофтхьабзэу «Крымские истории» зыфиIоу Къырым Урысыем къызщыхэхьажьыгъэм и Мафэ фэгъэхьыгъэр гъэтхапэм и 18-м къыщыублагъэу мэлылъфэгъум и 2-м нэс кIощт.
Гъэтхапэм и 18-м Урысые Федерацием щыхагъэунэфыкIы Къырым Урысыем къызщыхэхьажьыгъэм и Мафэ. Урысыем щыпсэурэ цIыфхэм шIу алъэгъурэ хыгъэхъунэныкъоу урыс тхэкIошхохэм ыкIи усакIохэм зидахэ бэрэ аIуагъэм 2014-рэ илъэсым мы мафэхэм адэжь Урысыем къыгъэзэжьыгъ.
Тарихъ мэхьанэ зиIэ хъугъэ-шIагъэм ехъулIэу проектэу «Культура для школьников» зыфиIорэм къыдыхэлъытэгъэ Урысые Iофтхьабзэу «Крымские истории» зыфиIоу IахьитIоу зэхэтыр кIощт.
КIэлэеджакIохэм лъэныкъуищкIэ ятворческэ амалхэр къагъэлъэгъонхэм иамал гъэтхапэм и 18-м къыщегъэжьагъэу мэлылъфэгъум и 2-м нэс аратыщт. Къырым фэгъэхьыгъэ усэхэм къяджэщтых, хыгъэхъунэныкъом икультурнэ чIыпIэ анахь гъэшIэгъонхэм афэгъэхьыгъэ рассказ къатхыщт, Къырым ичIыопс анахь дахэхэм ясурэт къашIын алъэкIыщт. IофшIагъэхэр социальнэ хъытыоу «ВКонтакте» зыфиIорэм рагъэхьанхэ алъэкIыщт. ахэр зэфэзыхьысыжьыщт комиссием анахь дэгъоу 30 къахихыщт, IэшIагъэхэр зиехэм сертификатхэр къаратыщтых ыкIи проектэу «Культура для школьников» зыфиIорэм ыцIэкIэ шIухьафтынхэр къафагъэшъошэщтых.
Джащ фэдэу гъэтхапэм и 18-м къыщыублагъэу мэлылъфэгъум и 2-м нэс порталэу «Культурадляшкольников.РФ» зыфиIорэмрэ социальнэ хъытыоу «ВКонтакте» зыфиIорэмрэ видеороликхэр къагъэлъэгъощтых. Хэгъэгум иактер цIэрыIохэр урыс тхэкIошхохэм Къырым фэгъэхьыгъэу атхыгъэхэм кIэлэеджакIохэм къафеджэщтых. Ащ нэмыкIэу кIэлэцIыкIухэм апае мастер-классэу «Крымский пейзаж» зыфиIорэр зэхащэщт. Урысыем изаслуженнэ сурэтышIэу Малафеевский Леонид Алексей ыкъом ар зэрищэщт. Социальнэ хъытыоу «ВКонтакте» зыфиIорэмкIэ Республикэу Къырым фэгъэхьыгъэ къэбар гъэшIэгъонхэр, викторинэхэр зэхащэщтых.