Адыгэ къэралыгъо университетым научнэ ассистентхэм якъыхэхын фэгъэхьыгъэ зэнэкъокъоу апэрэу щызэхащагъэм изэфэхьысыжьхэр къэнэфагъэх.
Шъугу къэдгъэкIыжьын, ащ хэлажьэ зышIоигъохэм мэзаем и 9-м къыщегъэжьагъэу и 19-м нэс ятхылъхэр къырахьылIагъэх.
Научнэ-ушэтын IофшIэным фэщэгъэ ныбжьыкIэхэр къыхэгъэщыгъэнхэр, студентхэр нахь фэщэгъэнхэр ары пшъэрылъ шъхьаIэу зэхэщакIохэм зыфагъэуцужьырэр. Джащ фэдэу АКъУ-м инаучнэ еджапIэхэм ахэгъэхъогъэныр, тапэкIэ Iоф зышIэщтхэр угъоигъэнхэр къыдалъытэзэ мы зэнэкъокъур зэхащагъ.
Научнэ ушэтынхэр апшъэрэ еджапIэм зыщызэхащэхэкIэ, научнэ ассистентыр ипащэ игъусэу Iоф ышIэщт. Ушэтынхэр ащ ышIынхэ, зэфэхьысыжьэу ахэм афэхъухэрэр къытын амал иIэщт. Джащ фэдэу экспедициехэм ыкIи хэушъхьафыкIыгъэ ушэтын проектхэм ахэлэжьэн ылъэкIыщт.
Зэфэхьысыжьэу ашIыгъэмкIэ, «Педагогическое образование», «Художественное образование и виды искусств» зыфиIорэ лъэныкъохэмкIэ я 2-рэ курсым имагистрантэу Агъыржьэнэкъо Ибрахьимэ къыхахыгъ. Научнэ пащэр профессо-
рэу, искусствоведениемкIэ докторэу Алла Соколовар ары.
«Литературное творчество», «Литературный работник, переводчик художественной литературы» зыфиIорэ лъэныкъохэмкIэ я 5-рэ курсым щеджэрэ Хъуажъ Раситэ къыхахыгъ. Научнэ пащэр профессорэу, филологие шIэныгъэхэмкIэ докторэу Унэрэкъо Рай.