Адыгэ Республикэм и Общественнэ палатэ 2022-рэ илъэсым ышIэгъэ IофшIэныр зыщызэфахьысыжьыгъэ зэхэсыгъо гъэтхапэм и 16-м иIагъ.
Iофтхьабзэхэм хэлэжьагъэх АР-м иминистрэхэм я Кабинет ипащэу КIэрэщэ Анзаур, Къэралыгъо Советым — Хасэм и Тхьаматэу Владимир Нарожнэр, Урысыем IофшIэнымкIэ и ЛIыхъужъэу,
УФ-м и Общественнэ палатэ хэтэу, Адыгеим, Къэбэртэе-Бэлъкъарым, КъэрэщэеЩэрджэсым янароднэ тхакIоу МэщбэшIэ Исхьакъ, общественнэ ыкIи профсоюз организациехэм япащэхэр.
Общественнэ палатэм итхьаматэу Устэ Руслъан зэхэсы-гъор пэублэ псалъэкIэ къызэIуихызэ, Урысые Федерацием и Общественнэ палатэ Адыгеим илIыкIоу хэхьащтым ихэдзынхэр зэрэрекIокIыгъэр къыхигъэщыгъ. Нахьыбэм амакъэ зыфатыгъэр МэщбэшIэ Исхьакъ.
АР-м и ЛIышъхьэу КъумпIыл Мурат шIуфэс тхыгъэу Общественнэ палатэм хэтхэм къафигъэхьыгъэм министрэхэм я Кабинет и Тхьаматэу КIэрэщэ Анзаур къеджагъ.
«Адыгеим хэхъоныгъэ ышIыныр, ащ щыпсэухэрэм ящыIэкIэ-псэукIэ зыкъегъэIэтыгъэныр пшъэрылъ шъхьаIэу тиIэхэм ащыщ. Общественнэ лъыплъэнымкIэ, цIыфхэм яшIоигъоныгъэхэр къиIотыкIыгъэнхэмкIэ, зэдэгущыIэгъу занкIэхэр адэшIыгъэнхэмкIэ палатэр тищыкIагъэу зэрэщытыр ар зылэжьэрэ илъэс пчъагъэхэм къагъэшъыпкъэжьын алъэкIыгъ. Социальнэ цIыф куп зэфэшъхьафхэм яшIоигъоныгъэхэр мыхэм къагъэгъунэх. Республикэм изыпкъитыныгъэ фэIорышIэрэ пшъэрылъ шъхьаIэхэр зэшIохыгъэнхэмкIэ гражданскэ пшъэдэкIыжь инэу зешъухьэрэмкIэ сышъуфэраз. Джащ фэдэу лъэпкъ проектхэр пхырыщыгъэнхэмкIэ, экономикэм, гъэсэныгъэм, культурэм, ныбжьыкIэхэм, псэупIэ-коммунальнэ хъызмэтым япхыгъэ Iофыгъохэм алъэныкъокIэ хэбзэгъэуцугъэхэр тштэнхэмкIэ шъуиеплъыкIэхэр къыдэтэлъытэх. Адыгеим щыпсэухэрэм зишIуагъэ якIыщт унашъохэр тызэгъусэу зэдэтэштэх. Мы уахътэм обществэмрэ хабзэмрэ язэдэлэжьэныгъэ мэхьанэ иI, арышъ, джыри тапэкIи тизэдэлэжьэныгъэ лъыдгъэкIотэным тыфэхьазыр», — къыщиIуагъ КъумпIыл Мурат итхыгъэ.
Министрэхэм я Кабинет Адыгеим и Общественнэ палатэ къыготэу чанэу зэрэзэдэлажьэхэрэмкIэ зэрафэразэр, джыри тапэкIи цIыфхэм яеплъыкIэхэр къыдыхалъытэхэзэ Iоф зэрэзэдашIэщтыр КIэрэщэ Анзаур хигъэунэфыкIыгъ.
Нэужым Устэ Руслъан икIыгъэ илъэсым ашIэгъэ IофшIэным къытегущыIэзэ, щэфакIохэм яфитыныгъэхэр къэухъумэгъэнхэм иIофыгъохэм, ныбжьыкIэ дзэ-патриотическэ движением хэхъоныгъэ ышIыным, коммунальнэ фэIо-фашIэхэр зшапхъэхэм адиштэу ягъэгъотыгъэнхэм, бизнес цIыкIум ыкIи гурытым IэпыIэгъу афэхъугъэным, нэмыкIхэми афэгъэхьыгъэ общественнэ мэхьанэ зиIэ Iофтхьабзэхэм палатэм хэтхэр зэрахэлэжьагъэхэр къыхигъэщыгъ.
Джащ фэдэу Общественнэ палатэм хэтхэм онлайн-зэхэсыгъуи 101-рэ рагъэкIокIыгъ, общественнэ уплъэкIунхэм къадыхэлъытэгъэ федеральнэ хэбзэгъэуцугъэ 44-мэ япроектхэм ахэплъагъэх.
Урысыем и Общественнэ палатэ къикIыгъэ письмэхэм ыкIи унашъохэм (пстэумкIи 658-рэ фэдиз) цIыфхэм лъэIоу зыкъызэрафагъэзагъэхэм Iоф адашIагъ.
— Мы уахътэм тикъэралыгъо зэрихьылIэгъэ гумэкIыгъор зэхэтэшIыкIы, ащ епхыгъэу Украинэм щыкIорэ хэушъхьафыкIыгъэ дзэ операцием детэгъаштэ. Илъэс къэс пшъэрылъ шъхьаIэу тиIэхэр зэхъокIыхэрэп ыкIи тинэплъэгъу идгъэкIыхэрэп, арышъ, мы къихьэгъэ илъэсми шIуагъэ къыхьэу палатэм Iоф зэришIэщтым сицыхьэ телъ. Къыхэзгъэщымэ сшIоигъу икIыгъэ илъэсым Адыгеим и Общественнэ палатэ хэтхэм чанэу Iоф зэрашIагъэмкIэ сызэрафэразэр, — къыIуагъ Устэ Руслъан.
Общественнэ палатэр республикэм щыкIогъэ Iофтхьабзэхэм зэрахэлэжьагъэм фэгъэхьыгъэ докладхэр зэхэсыгъом къыщашIыгъэх АР-м и Общественнэ палатэ ипащэ игуадзэу Анна Крюковам, УФ-м народнэ гъэсэныгъэмкIэ ыкIи наукэмкIэ иIофышIэхэм япрофсоюз и Адыгэ республикэ къутамэ ипащэу Жэдэ Зурыет, Общественнэ палатэм хэт Оник Нигоевым, нэмыкIхэми.
Iэшъынэ Сусан.
Сурэтхэр Iэшъынэ Аслъан тырихыгъэх.