Унэгъо ныбжьыкIэхэм унэ зэращэфыщт е зэрагъэпсыщт сертификатхэр АР-м и Правительствэ зычIэт унэм непэ щаратыжьыгъэх. Республикэм икъэлэ, ирайон зэфэшъхьафхэм къарыкIыгъэ унэгъуи 8-мэ ащ фэдэ сертификатхэр аратыгъэх.
Iофтхьабзэм хэлажьэхэрэм шIуфэс къарихи, Адыгеим и ЛIышъхьэу КъумпIыл Мурат зэрэхигъэунэфыкIыгъэмкIэ, къэралыгъо хэбзэ къулыкъухэм ренэу анаIэ зытырагъэтыхэрэм ащыщых унэгъо кIоцI хабзэхэр гъэпытэгъэнхэр, унагъом мэхьанэу иIэм зыкъегъэIэтыгъэныр.
«Унагъо пэпчъ щыIэкIэ-псэукIэ дэгъу иIэным, неущырэ мафэм ицыхьэ телъыным апае унагъом, ныхэм, кIэлэцIыкIухэм къэралыгъо IэпыIэгъу ягъэгъотыгъэнымкIэ амалэу щыIэхэр зэкIэ къызфэтэгъэфедэх», — къыIуагъ АР-м и ЛIышъхьэ.
Унагъом, ныхэм, кIэлэцIыкIухэм социальнэ IэпыIэгъу ягъэгъотыгъэнымкIэ, демографием зыкъегъэIэтыгъэнымкIэ Адыгеим Iофтхьэбзабэ щызэрахьэ. ШIогъэшхо къызыкIакIорэр унэгъо ныбжьыкIэхэм унэ къазэраратырэ къэралыгъо программэр ары. 2023-рэ илъэсым ащ ипхырыщын пае сомэ миллион 250-рэ фэдиз къыхагъэкIынэу рахъухьэ. А мылъкум ишIуа-
гъэкIэ унэгъуи 127-мэ псэукIэ амалэу яIэр нахьышIу хъущт.
«Социальнэ политикэм илъэныкъохэу Урысые Федерацием и Президентэу Владимир Путиным къыгъэнэфагъэхэм ащыщым ипхырыщынкIэ — социальнэ ахъщэ IэпыIэгъум ишIуагъэкIэ унэгъо ныбжьыкIэхэм щыIэкIэ-псэукIэу яIэм зыкъегъэIэтыгъэнымкIэ — ар зичэзыу лъэбэкъоу щыт. Мэхьанэшхо зиIэ сертификатыр къызэрэшъуатыгъэм шъуищыIэныгъэ нахьышIум ылъэныкъокIэ зэхъокIыныгъэхэр фишIыщтых, гухэлъэу шъуиIэхэр къыжъудэхъунхэмкIэ, кIэлэцIыкIухэм япIункIэ амалыкIэхэр шъуиIэщтых. Мы хъугъэ-шIэгъэ гушIуагъомкIэ сыгу къыздеIэу сышъуфэгушIо!» — къыIуагъ АР-м и ЛIышъхьэ.
Къэралыгъо IэпыIэгъу зэрафэхъухэрэ программэхэм яшIуагъэкIэ унэгъуабэмэ унакIэхэр къаратыным республикэм ипащэхэм тапэкIи алъэкI зэрэрахьылIэщтыр КъумпIыл Мурат къыхигъэщыгъ.
Къэралыгъо программэм хэлажьэхэрэм республикэм и ЛIышъхьэ «тхьауегъэпсэу» къыраIуагъ кIэлэцIыкIухэр зэрыс унагъохэм зэрафэгумэкIырэм фэшI. Джащ фэдэу къуаджэхэм хэхъоныгъэ зэрашIырэр, социальнэ фэIо-фашIэхэр нахьышIоу зэрафагъэцакIэхэрэр, щыIэкIэ-псэукIэм зыкъызэриIэтырэр ахэм къаIуагъ.
АР-м и ЛIышъхьэ ипресс-къулыкъу
Сурэтыр: А. Гусев.