Адыгэ Республикэм и Къэралыгъо Совет — Хасэм идепутатхэу, Адыгэ Республикэм имуниципальнэ образованиехэм ялIыкIо къулыкъухэм ядепутатхэу лъытэныгъэ зыфэтшIыхэрэр!
Республикэм ипарламентаризмэ и Мафэ фэшI тышъуфэгушIо!
Обществэм ищыIэныгъэкIэ джырэ лъэхъаным парламентаризмэм мэхьанэшхо иIэу щыт, социальнэ-экономикэ зэхъокIыныгъэхэр лъыкIотэнхэмкIэ, цIыфхэм ящыIакIэ нахьышIу хъуным фытегъэпсыхьэгъэ пшъэрылъхэр зэшIохыгъэнхэмкIэ, Конституцием къыдилъытэрэ фитыныгъэу ахэм яIэхэр мыукъогъэнхэмкIэ ар лъэпсэшIу мэхъу.
Адыгэ Республикэм и Къэралыгъо Совет — Хасэм, муниципалитетхэм ялIыкIо къулыкъухэм яхэбзэихъухьан IофшIэнэу шIуагъэ къэзытырэр тиреспубликэ ихэхъоныгъэкIэ амалэу щыIэхэр нахь гъэпытэгъэнхэм, общественнэ-политикэ зыпкъитыныгъэр мыукъогъэным, цIыф лъэпкъ зэфэшъхьафхэм къахэкIыгъэхэм зэгурыIоныгъэ азыфагу илъыным ыкIи нэмыкIхэм афэлажьэ.
Республикэм идепутатхэм аIэ зэкIэдзагъэу Iофышхо зэрагъэцакIэрэм, хэдзакIохэмкIэ пшъэдэкIыжьэу ахьырэр икъоу къызэрагурыIорэм апае инэу тызэрафэразэр къэтэIо.
Ныбджэгъу лъапIэхэр, тыгу къыддеIэу зэкIэми тышъуфэлъаIо псауныгъэ пытэ шъуиIэнэу, унашъохэм яштэн акъылыгъэ хэлъэу шъуекIолIэнэу, Адыгеимрэ Урысыемрэ яфедэ зыхэлъ Iофэу жъугъэцакIэрэм гъэхъагъэхэр щышъушIынхэу!
Адыгэ Республикэм и ЛIышъхьэу, Урысые политическэ партиеу «Единэ Россием» и Адыгэ шъолъыр къутамэ и Секретарэу КъумпIыл Мурат
Адыгэ Республикэм и Къэралыгъо Совет — Хасэм и Тхьаматэу Владимир Нарожнэр