Адыгэ Республикэм тыкъэзыуцухьэрэ дунаимрэ чIыопсым ибаиныгъэрэ якъэухъумэнкIэ и ГъэIорышIапIэ ипащэу Сергей Колесниковым ТАСС-м (Урысыем икъэбарлъыгъэIэс агентствэ) макъэ зэрэригъэIугъэмкIэ, Мыекъопэ районым километрэ 17 икIыхьагъэу пхырыкIырэ псыхъоу Джаджэм ычIэгъ щызэтырихьэгъэ чъыгыжъхэр, пыдзафэхэр, нэмыкIхэри заукъэбзыхэкIэ нэбгырэ 1300-мэ яхапIэхэр псыкъиуным ыгъэгумэкIыжьыщтхэп.
Сыд фэдэрэ псыхъуи ычIэ бгъэкъэбзэныр Iоф хьылъэу щыт. Ары Джаджэ игъэкъэбзэн гъогогъуищэу зыкIызэтыраутыгъэр. IофшIэнхэр 2016-рэ илъэсым рагъэжьэгъагъэх. С. Колесниковым къызэриIуагъэмкIэ, 2024-рэ илъэсым ыкIэм нэс IофшIэнхэр аухыщт, ащ сомэ миллион 64-м ехъу апэIухьащт.
Республикэм пхырыкIырэ псыхъохэм анахьыбэр къушъхьэхэм къащежьэх. Осыр зыщыжъущт лъэхъаныр, псыхъохэм зыкъызщаIэтыщтыр къэшIэгъуае. Мыекъопэ районым ит псэупIэхэу Гражданскэр, Дьяковар, Калининыр арых нахьыбэу мыщ ыгъэгумэкIыхэрэр. Ащ зэрарэу цIыфхэм къафихьырэм идэгъэзыжьын сомэ миллион пчъагъэ тырагъэкIуадэ.
IофшIэнхэр 2024-рэ илъэсым аухынхэу мэгугъэх, километрэ 17,4-м щыщэу агъэкъэбзэнэу къэнагъэр километри 4,8-рэ мэхъу.
Адыгеир пштэмэ, псыр къызыкIаорэр псэупIэ 80-м ехъу, ахэм нэбгырэ мин 70-рэ фэдиз ащэпсэу. ЧIыгу гектар мин 20-м ехъумэ чIэнэгъабэ арегъэшIы, зэрарыр сомэ миллиони 150-м нэсы. Аужырэ псыкъиушхоу 2002-рэ илъэсым Адыгеим къыщыхъугъагъэм цIыфхэм зэрарэу къафихьыгъэр сомэ миллиардым шIокIыгъагъ.
(Тикорр.).