Инспектор ныбжьыкIэхэм я Урысые движение (ЮИД) зызэхащагъэр гъэтхапэм и 6-м илъэс 50 хъугъэ. Ащ фэгъэхьыгъэ республикэ зэхахьэ Мыекъуапэ щыкIуагъ. Районхэм ащыIэ инспектор ныбжьыкIэхэм яотряд анахь дэгъухэм ялIыкIохэр ащ хэлэжьагъэх.
Джащ фэдэу игъэкIотыгъэ Iофтхьабзэм къеблэгъагъэх АР-м и Къэралыгъо Совет —Хасэм гъэсэныгъэмкIэ, шIэныгъэмкIэ, ныбжьыкIэ IофхэмкIэ, спортымкIэ, къэбар жъугъэм иамалхэм ыкIи общественнэ организациехэм зэпхыныгъэ адиIэгъэнымкIэ икомитет итхьаматэу Шэуджэн Тембот, гъэсэныгъэмрэ шIэныгъэмрэкIэ министрэм игуадзэу Артем Журавель, Адыгеим и Къэралыгъо автоинспекцие ипащэ игуадзэу Едыдж Мурат, кIэлэцIыкIухэм яфитыныгъэхэр къэухъумэгъэнхэмкIэ Уполномоченнэу Наталья Агеевар.
Къэралыгъом ит кIэлэцIыкIу движениехэм ащыщэу анахь цIыфыбэ зэлъызыщэхэрэм мыхэр апэ зэритхэр Шэуджэн Тембот ипэублэ псалъэ къыщыхигъэщыгъ. Инспектор ныбжьыкIэхэм яотрядхэр зэхэзыщэгъэ ветеранхэм, джы зыгъэIорышIэрэ кIэлэегъаджэхэм, мыхэм ахэтхэм рэзэныгъэ гущыIэхэр комитетым ипащэ къафиIуагъ. Ахэм яшIуагъэкIэ гъогурыкIоным хэлэжьэрэ ныбжь зиIэхэм анаIэ кIэлэцIыкIу зекIоным зэрэтырадзагъэр ащ хигъэунэфыкIыгъ.
Едыдж Мурат отрядхэм ахэтхэм ыкIи япащэхэм юбилей мафэмкIэ къафэгушIуагъ. ГъогурыкIоным хэлэжьэрэ ныбжьыкIэ цIыкIухэм ящыIэныгъэ ыкIи япсауныгъэ къызэтенэным ахэм яIахьышIу зэрэхэлъыр къыхигъэщыгъ.
Къэралыгъом ифэшъошэ цIыфхэу, творческэхэу ыкIи чанхэу щытынхэу къафэлъэIуагъэх гъэсэныгъэмкIэ министрэм игуадзэрэ омбудсмен шъхьаIэмрэ.
Республикэм мы движениер щызэхащэнэу зэрэхъугъэм, ащ икъежьапIэ Iутыгъэхэм афэгъэхьыгъэ фильмэу агъэхьазырыгъэм къэзэрэугъоигъэхэр еплъыгъэх.
МэфэкI чэфыгъор къэзыIэтыгъэхэм ащыщых Мыекъуапэ икIэлэцIыкIу творческэ купхэм ыкIи командэхэм ахэтхэм къагъэхьазырыгъэ къэгъэлъэгъонхэр.
МэфэкI Iофтхьабзэм цIыфыбэ зэрэхэлэжьагъэм джыри зэ къыушыхьатыгъ гъогухэм къатехъухьэрэ хъугъэ-шIагъэхэр нахь макIэ шIыгъэнхэмкIэ, зэфыщытыкIэу гъогум щызэфыряIэр гъэпытэгъэнымкIэ автоинспекторхэм зэрахьэрэ IофшIэным зэрэдырагъаштэрэм имызакъоу, ахэм хэкIыпIэхэр къафагъотыным ныбжьыкIэхэм еплъыкIэ гъэнэфагъэхэр зэрэфыряIэхэр.
Къэралыгъо автоинспекцием АдыгеимкIэ и ГъэIорышIапI
Сурэтыр: ГъэIорышапIэм ипресс-къулыкъу