Мэзаем ыкIэхэм адэжь ЗАГС-м мыкIохэу, суперсервискIэ зэджэгъэхэ шIыкIэмкIэ къэхъугъэ сабыир апэрэу атхыгъ.
АР-м и ЗАГС и ГъэIорышIапIэ къызэрэщаIуагъэмкIэ, онлайн къэралыгъо фэIо-фашIэр апэрэу зыгъэфедагъэр Мыекъопэ районым щыщхэр ары. Мы районым ит поселкэу Каменномостскэм и ЗАГС-мкIэ иотделрэ АР-м и ЗАГС и ГъэIорышIапIэрэ апэрэу ащ фэдэ шIыкIэмкIэ атхыгъэм ыцIэр Варвара.
Къэралыгъо къулыкъухэм уахэмыхьэу, тхьапэ зехьаным ухэмытэу джы сабыеу къэхъурэр суперсервискIэ птхын зэрэплъэкIыщтыр IофыгъошIоу зэкIэмэ къыхагъэщы.
— Сабыеу къэхъурэр ащ фэдэ шIыкIэмкIэ арагъэтхыным фэшI ны-тыхэр къэралыгъо фэIо-фашIэхэр зыщагъэцэкIэрэ Гупчэм хэтынхэ ыкIи электроннэ медицинэ свидетельствэ яIэным зэрэпэшIуемыкIохэрэр къаушыхьатын фае. Электроннэ документыр нэужым хьазыр хъущт, узыщыфаем ар бгъэфедэн плъэкIыщт, — къыщаIуагъ АР-м и ЗАГС и ГъэIорышIапIэ.
Ны-тыхэм яшIоигъоныгъэкIэ тхьапэкIэ шIыгъэ документхэри къаратыщтых.
Сурэтыр: зэIухыгъэ къэбарлъыгъэIэс амалхэр.