2022-рэ илъэсым ичъэпыогъу мазэ къыщегъэжьагъэу итыгъэгъазэ нэс, ащ ыпэрэ илъэсым елъытыгъэмэ, IофшIэн зимыIэу Адыгеим щыпсэурэм ипчъагъэ, тикъэралыгъо ишъолъырмэ ягъэпшагъэмэ, бэкIэ анахь макIэ хъугъэ, проценти 4,2-м нэсэу къеIыхыгъ, я 57-рэ чIыпIэм иуцуагъ. IофшIэным лъыхъуным уахътэу тырагъэкIуадэрэр гурытымкIэ зэрэхъурэр илъэсныкъу ныIэп. Росстатым зэфэхьысыжьэу ышIыгъэхэр иIэубытыпIэу ащ фэдэ пчъагъэхэр къехьы РИАрейтингым.
ЦIыфхэм IофшIэн ягъэгъотыгъэнымкIэ къулыкъушIапIэу АР-м итым къызэрэщыхагъэщыгъэмкIэ, цIыфхэмрэ IофшIэн къэзытыхэрэмрэ республикэм щадэIэпыIэх, ахэм зэрадэлажьэхэрэм шIуагъэ къеты. 2022-рэ илъэсым IофшIэн языгъэгъотырэ къулыкъушIапIэу Адыгеим итхэм зэкIэми Iофтхьэбзэ зэфэшъхьафхэр зэрахьагъэх, цIыфхэр пIэлъэ гъэнэфагъэкIэ IофшIапIэмэ аIуагъахьэхэуи, общественнэ IофшIэнхэр арагъэгъэцакIэуи хъугъэ. Лъэпкъ проектэу «Демографием» къыдыхэлъытэгъэ федеральнэ проектэу «IофшIэным лъыхъурэмэ адеIэгъэныр» зыфиIорэр агъэцакIэзэ, 2022-рэ илъэсым нэбгырэ 567-рэ рагъэджэжьыгъ, сэнэхьат зэфэшъхьафхэр арагъэгъотыгъ.
АР-м и ЛIышъхьэ зэрэхигъэунэфыкIыгъэмкIэ, проектышхоу республикэм щызэшIуахыщтхэм апкъ къикIыкIэ, джырэблагъэ IофшIэпIэ чIыпIакIэхэр нахьыбэу щыIэ хъущтых. ГущыIэм пае, экокурортэу «Лэгъонакъ» зыфиIорэм IофшIэпIэ чIыпIэ мини 2 къытыщт, Тэхъутэмыкъое районым промышленнэ паркыр зыщатIупщыкIэ, нэбгырэ мини 10 фэдиз ящыкIэгъэщт.