Хэта еджэным нахь фэIазэхэр? Адыгеим икIэлэеджакIохэм «Артекым» зэрэкIощтхэм зытырагъэпсыхьэ.
IупкIэ еджэнымкIэ Дунэе зэнэкъокъоу «Живая классика» зыфиIорэм иIофшIэн гъэтхапэм ригъэжьэщт. Тихэгъэгу щыщ нэбгырэ мин пчъагъэ ащ хэлэжьэщт, якIэсэ прозаическэ произведениехэм къахэхыгъэ пычыгъохэм езбырэу къяджэщтых. Зэнэкъокъум иапэрэ чэзыу еджэпIэ кIоцIхэм ащыкIощт. ЗэлъашIэрэ произведениехэм ясюжетхэр, ахэм къяджэхэрэм ялъытыгъэу, кIэ шъыпкъэу къэIущтых. Нахь макIэу зыфэнэIуасэхэри проектым ишIуагъэкIэ цIыфхэм зэлъашIэщт.
Литературнэ проектым хэлажьэхэрэр еджакIохэу илъэси 10-м къыщегъэжьагъэу 17-м нэс зыныбжьхэр арых. Ащ паекIэ, хэти ежь ишIоигъоныгъэкIэ зы прозэ произведение урысыбзэкIэ тхыгъэу, еджэн программэм хэмытэу ыштэнышъ, Iоф дишIэн фае. Къеджэн уахътэм такъикъи 5 нахьыбэ текIодэнэу щытэп.
ТекIоныгъэм уфэкIоным пае едзыгъуи 5 зэпыпчынэу щыт. Iофтхьабзэр апэдэдэ классым ыкIи еджапIэм ащыкIощт. ОсэшIхэм анахь дэгъоу зыкъэзыгъэлъэгъогъэ нэбгырищ къыхахыщт. Нэужым ахэр район уцугъом щызэIукIэщтых, щызэнэкъокъущтых, анахь дэгъу нэбгырищым шъолъыр едзыгъом зыщаушэтыщт. Апэрэ чIыпIищыр къыдэзыхырэ нэбгырищыр зэлъашIэрэ дунэе кIэлэцIыкIу гупчэу «Артекым» агъэкIощтых, ащ щыкIощт кIэух зэнэкъокъум хэти ежь ишъолъыр ыцIэкIэ хэлэжьэщт.
IупкIэ къеджэнымкIэ ныбжьыкIэхэм я Дунэе зэнэкъокъоу «Живая классика» зыфиIорэм кIэщакIо фэхъугъэх Урысыем гъэсэныгъэмкIэ и Министерствэ, президент грантхэмкIэ Фондыр, нэмыкI къулыкъухэр.
ТекIоныгъэр къыдэзыхыхэрэр шIухьафтын ыкIи нэмыкI нэпэеплъхэмкIэ агъэшIощтых.