КIэлэцIыкIухэм гъэсэныгъэ тедзэ зыщарагъэгъотырэ республикэ гупчэм зэнэкъокъоу «Наставник ЮИД» зыфиIорэр щыкIуагъ.
Ар лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм хэхьэрэ шъолъыр проектэу «ГъогурыкIоныр щынэгъончъэным» къыдыхэлъытагъ. Инспектор ныбжьыкIэхэм яотрядхэр (ЮИД) загъэпсыгъэр илъэс 50 зэрэхъурэм зэнэкъокъур фэгъэхьыгъагъ.
Апэрэ заочнэ едзыгъом зэнэкъокъум хэлажьэхэрэм япортфолио зэхэщэкIо комитетым рагъэхьыгъ. ЯтIонэрэ уцугъом ежьхэм афэгъэхьыгъэ къэбарыр гъэшIэгъонэу къыраIотыкIыгъ, нэужым гъогурыкIоным ишапхъэхэр зэрашIэрэмкIэ уплъэкIун арагъэкIугъ. Джащ фэдэу мастер-классэу «Современные формы профилактики детского дорожно-транспортного травматизма в образовательной деятельности» зыфиIорэр къагъэлъэгъуагъ.
Урамым ыкIи гъогум тэрэзэу зэрэщызекIощтхэ шIыкIакIэхэр зыгъэфедэу, творческэ екIолIэкIэ гъэшIэгъонхэр IофшIэным къыфэзгъотырэ кIэлэегъаджэхэр республикэм бэу зэрисхэр зэнэкъокъум къыгъэнэфагъ.
Ащ зыкъыщызгъэлъэгъуагъэхэм жюрим осэшIу афишIыгъ. ТекIоныгъэр къыдэзыхыгъэр ыкIи къахэщыгъэхэр шIухьафтынхэмкIэ агъэшIуагъэх.
Iофтхьабзэм икIэух кIэлэегъаджэхэр чанэу къызэрэхэлэжьагъэхэмкIэ, илъэс зэкIэлъыкIохэм ЮИД движением хэхъоныгъэ ышIыным яIахьышIу зэрэхалъхьэрэмкIэ зэрафэразэхэр къыIуагъ Адыгеим и Къэралыгъо автоинспекцие пропагандэмкIэ иотдел ипащэу, полицием иподполковникэу Бзэджэжъыкъо Мурат.