Сакъыныгъэ къызхэжъугъаф

Урысые къэбарлъыгъэIэс Iофтхьабзэм къыдыхэлъытагъэу хьыкум приставхэм я Федеральнэ къулыкъу АдыгеимкIэ и ГъэIорышIапIэ цIыфхэм агу къегъэкIыжьы электроннэ сервис зэфэшъхьафхэм зарыхьэхэкIэ сакъыныгъэ къызхагъэфэн ыкIи щынэгъончъэным ишапхъэхэр агъэцэкIэнхэ зэрэфаер.

БзэджашIэхэм шIыкIэ зэфэшъхьафхэр къызфагъэфедэзэ къэбар нэпцI зэрыт электроннэ тхыгъэхэр цIыфхэм аIэкIагъахьэ. ГущыIэм пае, чIыфэ ателъэу ыкIи ар псынкIэу къапщынын фаеу. Ар замыгъэцакIэкIэ ябанк счетхэм ыкIи ямылъку арест атыралъхьащтэу агурагъаIо. Ащ фэдэ къэбар нэпцIхэр шъушIошъ шъумыгъэхъу.

ГъэпцIакIохэм къышъуфагъэ­хьын алъэкIыщт чIыфэр шъупщыныным пае банк картэм иномер ищыкIагъэу. Джащ фэд, зэIукIэгъэ чIыфэм лъапсэ фэхъу­гъэр зэжъугъэшIэным пае сайт гъэнэфагъэм шъуихьан фаеу къышъуаIощт. Ащ фэдэ лъэбэ­къум ыуж Интернетым ихъытыу зыгъэфедэхэрэм файл гъэнэфагъэм теIункIэнхэ фаеу къара­Iощт, ащ социальнэ хъытыум иIофшIэн зэщызыгъэкъорэ вирусыр пылъ. Нэужым цIыфым къэбарэу пылъыр зэкIэ ыкIи ибанк картэ иреквизитхэр бзэ­джашIэхэм аIэкIэхьэх.

Джыри зэ зыкъышъуфэтэгъа­зэ, мыщ фэдэ электроннэ тхыгъэхэр къышъуфагъэхьыгъэмэ, сакъыныгъэ къызхэжъугъаф, гъэпцIакIохэм аIорэр шъумыгъэ­цакIэ. Джащыгъум шъуиахъщэ къызэтенэщт, шъори гумэкIыгъо шъухэфэщтэп.

ЦIыфым ылъэныкъокIэ Iоф къызэIуахыгъэмэ, ащ пылъ къэ­бар шъыпкъэр почтэмкIэ е къэралыгъо фэIо-фашIэхэм япорталкIэ фагъэхьы. Ар зэкIэми ашIэн фае.
ЧIыфэ шъутелъмэ зэжъугъэшIэным фэшI хьыкум пристав­хэм я Федеральнэ къулыкъу иофициальнэ сайтэу «Банк данных исполнительных производств» зыфиIорэм иамалхэр къызфэжъугъэфедэнхэ шъулъэ­кIыщт.

Хьыкум приставхэм я Федеральнэ къулыкъу АдыгеимкIэ и ГъэIорышIапIэ ипресс-къулыкъу.