Командэ 518-рэ хэлэжьагъ

Урысые общественнэ организациеу «Лига здоровья нации» зыфиIорэм лъэс кIонымкIэ зэхищэгъэ зэнэкъокъум Мыекъуапэ икомандэ ащытекIуагъ.

Командэу «Мыекъуапэ 01» зыфиIорэр мы зэнэкъокъум ятIо­нэрэу хэлажьэ, зэкIэмкIи ащ нэбгырэ 22-рэ хэт. ШэкIогъум рагъэкIокIыгъэ Iофтхьабзэм я 4-рэ чIыпIэр къыщыдихыгъагъ.

— ТекIоныгъэр къыдэтхыным тишъыпкъэу зыфэдгъэхьазырыгъ. Командэ дэгъу дэдэ тиI ыкIи ащ ыпашъхьэ щыт пшъэрылъыр зэрифэшъуашэу ыгъэцэкIагъ. Нэбгырэ пэпчъ мафэ къэс лъэбэкъу мин 25-рэ ышIыгъ, — къыIуагъ командэм икапитанэу Бзаго Рустам.

Урысыем ишъолъыр зэфэ­шъхьафхэм якомандэ 518-рэ зэнэкъокъум хэлэжьагъ. Адыгеим илIыкIохэм текIоныгъэр къафагъэ­шъошагъ, ятIонэрэ хъугъэ Ивановскэ хэкум икомандэу «Пучежские нордики» зыфиIорэр, ящэнэрэ чIыпIэр къыдихыгъ Якутием ико­мандэу «Тулуна идущая» зыцIэм.