Адыгеим испортсмен финалым ихьагъ

Теннис цIыкIумкIэ Къыблэ федеральнэ шъо­лъы­рым ичемпионат щылэ мазэм и 23-м щегъэ­жьа­гъэу и 27-м нэс Мыекъуапэ щыкIуагъ.

Субъекти 6-мэ яспортсмен анахь лъэшхэр зэнэкъокъум щызэIукIагъэх. Ахэр Адыгеим, Къырым, Къалмыкъым, Краснодар краим, Ростов хэкум ыкIи Се­вастополь ялIыкIох. ЗэкIэмкIи зэнэкъокъум нэбгырэ 90-рэ хэлэжьагъ, ахэм ащыщэу 21-р Уры­сыем спортымкIэ имастерых.

— Мы илъэсым чемпионатыр нахь лъэш хъугъэ, сыда пIомэ Къыблэ федеральнэ шъо­лъырым ренэу щыпсэунхэу къы­хэ­зыхыгъэ спортсмен цIэрыIохэр ащ хэлэжьагъэх, ахэм зэнэкъо­къур нахь гъэшIэгъон къашIыгъ. Iоф­тхьабзэр зыщыкIогъэ Адыгэ къэ­ралыгъо университетым сыд фэ­­дэрэ лъэныкъокIи амалышIу-хэр IэкIэлъых, хьакIэу къе­блэ­гъагъэ­хэр зэхэщакIохэм, бысымхэм афэрэзагъэх, — къыриIуагъ ти­гъэзет зэнэкъокъум исудья шъхьа­Iэу Владимир Бо­ровик.

Зэнэкъокъур зыщыкIогъэ ма­фэхэм субъект зэфэшъхьафхэм къарыкIыгъэ спортсменхэр ха­гъэунэфыкIырэ чIыпIэхэм афэбэнагъэх. Анахьэу къахэщыгъэхэр Краснодар краим илIыкIохэр ары. Адыгеим испортсменхэр гъого­гъуи 6-р подиумым дэкIоягъэх. Джащ фэдэу хэдгъэунэфыкIынэу тыфай я 5-рэ чIыпIэр къыдэзыхыгъэ спортымкIэ мастерэу, Адыгэ къэралыгъо университетым истудентэу Илья Шамин. Мы зыр ары республикэм ыцIэкIэ Урысыем ичемпионат ифинал едзыгъо хэлэжьэнэу фитыныгъэ къыдэзыхыгъэр. Ар мы илъэсым къалэу Оренбург щыкIощт. Финалым изэ­нэкъокъу хэлэжьэнхэу нэбгыри 10-мэ путевкэхэр къыдахы­гъэх, хъулъфыгъэхэри бзылъфыгъэхэри тфырытфых. Ахэм ащыщэу 9-р Краснодар краим илIыкIох. Къыблэ федеральнэ шъо­лъырым ичемпион хъугъэх спортымкIэ мастерхэу Андрей Байбулдинрэ Валерия Коцюррэ.