ЫпкIэ къыхэхъуагъ, фэгъэкIотэныгъэхэр…

2023-рэ илъэсым щылэ мазэм и 1-м къыщегъэжьагъэу Фе­деральнэ хэбзэгъэуцугъэу n 208-м кIуачIэ иIэ хъугъэ.

Ащ ястатьяу 333.33-м ия 2-рэ Iахь зэхъокIыныгъэу фашIыгъэм къызэрэдилъытэрэмкIэ, транспорт амалхэм язэхэлъыкIэ зэ­хъокIыныгъэ фашIынымкIэ ыкIи щынагъоу щыт хьылъэхэр зэращэнхэмкIэ фитыныгъэ къаратыным ифэIо-фашIэ къафагъэцэкIэным пае джы къэралыгъо пошлинэр атыщт. Ащ ыпкIэ зыфэдизыщтыр автомобилым рашIылIэщт зэхъокIыныгъэр зыфэдэм, щынэгъончъагъэм ишап­хъэхэм ялъытыгъэщт.

Къэралыгъо пошлинэр зыфэдизыщтыр:

— щэрэхъ зыкIэт транспорт амалэу агъэфедэрэм изэхэлъыкIэ зэхъокIыныгъэ фашIынымкIэ фитыныгъэ ятыгъэныр — сомэ 1000;

— щынагъоу щыт хьы­лъэ­хэр зэращэнымкIэ транспорт амалхэм фи­тыныгъэ ятыгъэныр — 1500-рэ;

— щынагъоу щыт хьы­лъэ­хэр зэращэнымкIэ транспорт амалхэм фи­тыныгъэу аратыгъагъэм ипIа­лъэ лъыгъэкIотэгъэныр — сомэ 1000;

— транспорт амалым изэхэлъыкIэ зэхъокIыныгъэу фашIыгъэр щынэ­гъончъагъэм ишапхъэхэм зэрадиштэрэр къэзыушы­хьатырэ тхылъыр ятыгъэныр — сомэ 1500-рэ.

Техническэ уплъэкIуным ыпкIи къыхэхъуагъ

Ар зыфэдизыщтыр: авто­мобиль псынкIэхэм апае сомэ 913-рэ, хьылъэ­зещэхэм — сомэ 999-рэ, автобусхэм — сомэ 1563-рэ. Фаркоп зимашинэ пыз­гъэуцо зышIоигъохэм сомэ 2500-рэ (сомэ 800 ыосагъ) атыщт.

Хьыкумым унашъо ымы­шIыгъэми, джы тазыр­хэм­кIэ чIыфэр банк кар­тэхэм е счетым рахыщтых.

ОСАГО-м ыпкIэ ипроцент 50 пэIудзыгъэ шIыкIэм тетэу сэкъатныгъэ зиIэхэм атын алъэкIыщт.

ЗэхъокIыныгъэхэр

2023-рэ илъэсым щылэ мазэм и 1-м къыщегъэ­жьагъэу къэралыгъо фэ­Iо-фашIэхэм я ПорталкIэ атыщтыгъэ къэралыгъо пошлинэхэм яIэгъэ фэгъэ­кIотэныгъэу процент 30 хъущтыгъэр щыIэжьэп.

Водительскэ удостоверениер къыдэхыгъэным е зэблэхъугъэным сомэ 2000 ыуасэмэ, фэгъэкIо­тэныгъэмкIэ а фэIо-фашIэр сомэ 1400-кIэ къыдэкIыщтыгъ.

Транспорт амалыр зэратхыгъэр къэзыушыхьатырэ тхылъыр къыдэпхыным сомэ 500 ыуас, фэгъэкIотэныгъэ зиIэхэм со­мэ 350-рэ атыщт.

Транспорт амалым ипаспортыкIэ къыдэпхыным сомэ 800 ыуас, фэгъэ­кIотэныгъэ уиIэмэ сомэ 560-рэ.

ГъогурыкIоным ишап­хъэхэр зэраукъуагъэмкIэ фэгъэкIотэныгъэ яIэу тазырхэм япроцент 50 къэралыгъо фэIо-фашIэхэм я ПорталкIэ зэратыщтыгъэр къэнэжьыгъ.