Лъэпкъ проектхэр

IэкIыбым агъакIорэр


«Дунэе кооперациер ыкIи IэкIыбым агъакIорэр» зыфиIорэ лъэпкъ проектым къыдыхэлъытагъэу икIыгъэ 2022-рэ илъэсым Адыгеим имэкъумэщ хъыз­мэт ипродукциеу доллар миллион 14,5-рэ ауасэ IэкIыб къэралхэм ащыIуагъэкIыгъ.

Урысые Федерацием и Президент кIэщакIо зыфэ­хъугъэ лъэпкъ проектхэм къадыхэлъытагъэу респуб­ликэм икIыгъэ илъэсым щызэшIохыгъэ хъугъэр со­циальнэ интернет нэкIубгъохэм кIэкIэу къащызэфи­хьысыжьыгъ АР-м и ЛIышъхьэу КъумпIыл Мурат.

— Адыгеир мы лъэпкъ проектым зэрэхэлажьэрэм IэкIыб къэралэу типродукцие зыщыIудгъэкIыхэрэм япчъагъэ нахьыбэ хъунымкIэ ишIуагъэ къэкIо. Джащ фэдэу республикэм къыщыдагъэкIыхэрэр дунэе къэгъэлъэгъонхэм ахэдгъэлэжьэнхэу, нэкъокъогъухэм апэдгъэуцужьынхэу амал къытеты. Къэралыгъом ынаIэ къызэратетым ишIуагъэкIэ тихъызмэтшIапIэхэм ящыкIэгъэ IэпыIэгъур агъоты, упчIэжьэгъу афэхъух.

ЛIышъхьэм тызэрэщигъэгъозагъэмкIэ, мы лъэпкъ проектым къыдыхэлъытагъэу «Шъолъыр экспортнэ шапхъэу 2.0» зыфиIорэм амалэу къытырэ пстэур республикэм щагъэфедэ. Урысыем ишъолъырхэм япродукцие IэкIыбым щыIуагъэкIынымкIэ къэралыгъо IэпыIэгъу ягъэгъотыгъэным ар фытегъэпсыхьагъ. Шъо­лъыр пэпчъ щытыкIэ шъхьафэу иIэр къыдэлъытагъэу экспортыр нахьыбэу къыIэкIэхьаным екIолIэкIэ гъэнэфагъэ къыфэгъотыгъэныр ары «Шъолъыр экспортнэ шапхъэу 2.0-м» мурад шъхьаIэу иIэр.

«Бизнес цIыкIур ыкIи гурытыр»

АР-м и ЛIышъхьэ изэфэхьысыжьхэмкIэ, мы лъэпкъ проектым къыдыхэлъы­та­гъэу 2022-рэ илъэсым зэшIохыгъэ хъугъэхэм пстэумкIи сомэ миллиони 167,07-рэ апэIухьагъ.

Предпринимательхэм IэпыIэгъу ятыгъэнымкIэ Гупчэр бизнесым щылажьэу икIыгъэ илъэсым зыдеIагъэр 1360-рэ мэхъу. Ар ыпэрэ 2021-м IэпыIэгъу зыгъотыгъэхэм 465-кIэ нахьыб.

2022-рэ илъэсым IофшIэн ежь-ежьырэу къызфэзгъотыжьэу (самозанятые) республикэм исым ипчъагъэ лъэшэу хэхъуагъ. ГъэрекIо ахэр нэбгырэ 7158-кIэ нахьыбэ хъугъэх ыкIи, тыгъэгъазэм и 1-м зэрагъэунэфыгъэмкIэ, нэбгырэ 13731-м нэсыгъ.

Республикэм ипащэ къызэритхыгъэмкIэ, предпринимательхэм IэпыIэгъу ятыгъэнымкIэ Гупчэр икIыгъэ илъэсым бизнесыр мылъку къэкIуапIэу зышIы зышIоигъо нэбгырэ 1181-мэ упчIэжьэгъу афэхъугъ, ащ испециалистхэм бизнес-плани 175-рэ зэхагъэуцуагъ, нэмыкI тхылъэу ящыкIагъэхэри афагъэпсыгъэх.

Джащ фэдэу мы Гупчэм ишIуагъэкIэ дунэе къэ­гъэлъэгъон-ермэлыкъи 4-мэ типредпринимательхэр ахэлэжьагъэх, гъогогъуи 4 IэкIыб къэралхэм ащы­Iагъэх.

— Бизнесым пылъхэм е ыуж ихьэмэ зышIоигъохэм апае амалэу щыIэхэм илъэс къэс ахэхъо. Инвесторхэр нахьыбэу къеблэгъэнхэм шъолъырхэр зэ­рэфэхьазырхэр 2022-рэ илъэсым зызэрагъапшэм, Адыгеир пэрытныгъэ зыIыгъ 20-мэ ахэфагъ. Респуб­ликэм ипредпринимательхэм Iоф ашIэным ищыкIа-гъэр зэкIэ агъоты. УпчIэхэм яджэуапхэр къызща­ратыжьыщтэу, фэIо-фашIэу ящыкIагъэхэр къафэз­гъэцэкIэщт гупчэхэр район пэпчъ къыщызэIутхыгъэх. «Бизнес цIыкIур ыкIи гурытыр» зыфиIорэ лъэпкъ проектым ишIуагъэкIэ бизнесым илIыкIохэм яшIэныгъэ хагъэхъон, ищыкIагъэмэ нэ­мыкI сэнэхьат феджэнхэ алъэкIыщт, грантхэм апае зэнэкъокъухэм, дунэе ермэлыкъхэм, къэгъэлъэгъонхэм ахэлэжьэнхэ амал яIэ хъугъэ, — къыщеIо КъумпIыл Мурат ихъытыу нэкIубгъо.

ХЪУТ Нэфсэт.