Урысые Федерацием цIыф жъугъэхэм якъэухъумэнкIэ IофшIэнхэм язэхэщэн имазэ мэфэкI шIыкIэм тетэу щылэ мазэм и 24-м Адыгэ Республикэм щырагъэжьагъ. 
Ащ епхыгъэ Iофтхьабзэу Урысыем и ДОСААФ икъутамэу Адыгэ Республикэм щыIэм щыкIуагъэм хэлэжьагъэх АР-м иветеранхэм я Совет итхьаматэу, отставкэм щыIэ полковникэу Къоджэ Аслъан, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэ игуадзэу Константин Щербаковыр, зыкъэухъумэжьынымкIэ Адыгэ республикэ организацием, ветеранхэм я Совет, дзэ комиссариатхэм ялIыкIохэр, дзэ-патриотическэ клубхэм, лъыхъон отрядхэм ахэтхэр, юнармейцэхэр, кIэлэеджакIохэр.
ЗыкъэухъумэжьынымкIэ Урысыем и ДОСААФ зызэхащагъэр илъэс 96-рэ, фашист техакIохэр зэхакъутэхи, Адыгеир шъхьафит зашIыжьыгъэр илъэс 80, Советскэ Союзым щэгъогогъо и ЛIыхъужъэу, авиацием имаршалэу Александр Покрышкиныр къызыхъугъэр илъэси 110-рэ зэрэхъухэрэм ыкIи Хэгъэгум иухъумакIо и Мафэ мы мазэр афэгъэхьыгъэщт.
Пэублэм ныбжьыкIэхэр зыхэлэжьэгъэ зэнэкъокъухэм афэгъэхьыгъэ видеофильмэу Къэралыгъо телерадиокомпаниеу «Адыгеям» ипрограммэу «Патриотым» къыгъэхьазырыгъэм къэзэрэугъоигъэхэр рагъэплъыгъэх.
Iофтхьабзэр Мыекъопэ районым гъэсэныгъэмкIэ и Гупчэу N 2-м идзэкIолI ныбжьыкIэхэм яотрядэу «Варяг» зыфиIорэм къызэIуихыгъ.
Нэужым гущыIэр лъигъэкIотагъ Урысыем и ДОСААФ икъутамэу Адыгэ Республикэм щыIэм итхьаматэу, запасым щыIэ подполковникэу Барцо Тимур. Мы мазэр хэгъэгум рэхьатныгъэ илъыным, щынэгъончъэу щыпсэунхэм, кIэлэцIыкIухэмрэ ныбжьыкIэхэмрэ япатриотическэ пIуныгъэ уахътэм диштэу зэхэщэгъэным, дзэ къулыкъум фэгъэхьазырыгъэнхэм зэрафэIорышIэрэр ащ къыхигъэщыгъ.
Джащ фэдэу ДОСААФ-м итарихъ, шэн-хабзэу иIэхэр ныбжьыкIэхэм ягъэшIэгъэнхэр, мамыр щыIакIэр гъэпытэгъэныр Iофыгъо шъхьаIэхэу Т. Барцом ылъытагъэхэм ащыщых.
— Илъэс къэс мыщ фэдэ мафэм зэрэ Урысыеу цIыф жъугъэхэм якъэухъумэнкIэ Iофтхьабзэхэр зыщыкIощтхэ мазэр рагъажьэ, — къыIуагъ ащ. — Адыгеим и ДОСААФ ащ чанэу хэлажьэ. Анахь пшъэрылъ шъхьаIэу тиIофшIэнкIэ тиIэщтыр тарихъ хъугъэ-шIагъэхэр, а лъэхъан къинхэм ти Хэгъэгу къэзыухъумэгъэ цIыфхэр тыгу къэдгъэкIыжьынхэр, къыткIэхъухьэрэ лIэужхэм ахэр ядгъэшIэнхэр, яхэгъэгу шIу алъэгъоу, къаухъумэным фэхьазырхэу пIугъэнхэр ары.
Нэужым ДОСААФ-м хэхьагъэхэм Барцо Тимур афэгушIуагъ, ятхылъхэр аритыжьыгъ. Шъолъыр къутамэм иIофшIэн чанэу къыхэлэжьагъэхэм, зэхищэрэ зэнэкъокъухэм къащыхэщыгъэхэм, ахэр зыгъасэхэрэм рэзэныгъэ тхылъхэр афагъэшъошагъэх: Урысые дзэ-патриотическэ общественнэ движениеу «Юнармием» икъутамэу Мыекъуапэ щыIэм иштаб ипащэу Ирина Князевам, Мыекъуапэ илицееу N 19-м иныбжьыкIэ армие иотряд ипащэу Олег Тугушевым, дзэ-патриотическэ клубэу «ZаОтечестVо» зыфиIорэм ипащэу Владимир Стасевым, нэмыкIхэри.
Ветеранхэм я Совет итхьаматэу Къоджэ Аслъан мэхьанэшхо зиIэ Iофтхьабзэр зэрэрагъэжьагъэр хигъэунэфыкIыгъ. Патриотизмэм кIуачIэу хэлъыр зэрэиныр, ащ тиныбжьыкIэхэр фэгъэсэгъэнхэм зэрэхэлажьэхэрэр къыхигъэщыгъ. Тарихъ мэхьанэ зиIэ мэфэкIхэмкIэ мы мазэр зэрэбаир, ахэм япхыгъэ Iофтхьабзэу Адыгеим щызэхащэхэрэм Советымрэ ДОСААФ- мрэ зэготхэу зэрахэлажьэхэрэр Къоджэ Аслъан къыIуагъ.
АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэ игуадзэу Константин Щербаковым гущыIэр лъигъэкIотагъ. Комитетым итхьаматэу Шъхьэлэхъо Аскэр ыцIэкIэ шIуфэс къарихыгъ. Республикэ ДОСААФ-м иIофшIэн осэшIу къыфишIызэ, ныбжьыкIэхэр дзэ къулыкъум фэгъэхьазырыгъэнхэм, дзэ-патриотическэ, интернациональнэ пIуныгъэр ахэм ахэлъхьэгъэным дэлэжьэрэ организацие закъоу тишъолъыр зэритыр ар къыхигъэщыгъ.
Щылэ мазэм и 23-м къыщегъэжьагъэу мэзаем и 23-м нэс Iофтхьэбзэ зэфэшъхьафхэр республикэм щыкIощтых. Автопробегхэр, лIыхъужъныгъэм иурокхэр, зэнэкъокъухэр зэхащэщтых. Хэгъэгу зэошхом иветеранхэм ныбжьыкIэхэр аIуагъэкIэщтых, щымыIэжьхэм яшIэжь агъэлъэпIэщт, музейхэр къарагъэкIухьащтых.
Iэшъынэ Сусан.
Сурэтхэр Iэшъынэ Аслъан тырихыгъэх.