Хьашъхъо Данэ лъэныкъо зэфэшъхьафхэмкIэ сэнаущыгъэ хэлъ, шIэныгъэм имызакъоу, общественнэ IофшIэнхэм чанэу ахэлажьэ, республикэ, урысые зэнэкъокъухэм текIоныгъэ къащыдехы.
Кощхьаблэ дэт гурыт еджапIэу N 2-р пшъэшъэжъыем къызеухым, Адыгэ къэралыгъо университетым социальнэ технологиехэмкIэ ыкIи зекIонымкIэ ифакультет чIэхьагъ. Социальнэ IофшIэным фэгъэзэгъэ сэнэхьат зэригъэгъотыгъэу магистратурэм чIэхьажьыгъ. Джы профессиональнэ гъэсэныгъэм фэгъэзагъэу ишIэныгъэхэхм ахегъахъо.
Апэрэ мафэм къыщегъэжьагъэу Данэ илэгъухэмкIэ щысэтехыпIэу щыт. Студент шIэныгъэ обществэу факультетым щызэхащагъэм ипащэу хадзи, илъэс пчъагъэрэ игъэхъагъэхэмкIэ къахэщыгъ.
— Апшъэрэ еджапIэм сыкъызычIэхьагъэм къыщегъэжьагъэу еджэным имызакъоу, общественнэ IофшIэнхэм сахэлэжьэныр пшъэрылъэу зыфэзгъэуцужьыгъагъ. Шъолъыр ыкIи дунэе Iофтхьэбзэ зэфэшъхьафхэм сахэлажьэ ыкIи амалэу сиIэмкIэ зэрифэшъуашэу зыкъэсэгъэлъагъо. Ростов, Москва, Волгоград, нэмыкI къэлэ инхэм ащыкIогъэ конференцие зэфэшъхьафхэм сахэлажьэу хъугъэ. АщкIэ IэпыIэгъу къысфэхъурэр научнэ пащэу сиIэ, педагогическэ шIэныгъэхэмкIэ докторэу, кафедрэм ипрофессорэу Мария Паатовар ары, — еIо Данэ.
ШIэныгъэ-ушэтын IофшIэнхэмкIэ Урысые зэнэкъокъум ифинал Данэ гъэрекIо ихьагъ. Джащ фэдэу Урысые интернет конференцием хэлэжьагъ. УшэтэкIо ныбжьыкIэхэм ыкIи студентхэм онлайн, пэIудзыгъэ шIыкIэм тет еджэнхэр зэралъэгъурэм фэгъэхьыгъэ докладэу ыгъэхьазырыгъэр ашIогъэшIэгъоныгъ. 2022-рэ илъэсым ыкIэм джащ фэдэу шIэныгъэлэжь ныбжьыкIэхэм яя II-рэ Конгресс хэлэжьагъ.
ЕджэнымкIэ гъэхъэгъэшIухэр зэришIырэм дакIоу ящэнэрэ курсым къыщегъэжьагъэу педагогикэмкIэ ыкIи социальнэ психологиемкIэ кафедрэм Iоф щешIэ. Пшъэшъэ ныбжьыкIэр ыпэкIэ маплъэ, апшъэрэ еджапIэм имагистратурэ зэрифэшъуашэу къыухынышъ, зыфигъэзэнэу фай. Пшъэшъэжъые нэутхэм гъэхъэгъэшIухэр ыпэкIэ зэришIыщтым егупшысэ. Аспирантурэм чIэхьажьын гухэлъ иI.