ЗыкI къэралыгъо ушэтынхэм яшIуагъэкIэ шIэныгъэ дэгъу зыIэкIэлъ тиныбжьыкIэхэр Урысыем иапшъэрэ еджэпIэ зэфэшъхьафхэр ачIэхьанхэ амал агъоты.
Мыекъопэ гимназиеу N 22-р гъэрекIо къэзыухыгъэ НатIэкъо Саидэ И.М. Сеченовым ыцIэ зыхьырэ апэрэ Московскэ къэралыгъо медицинэ университетым щеджэ. ИгъэхъагъэхэмкIэ къахэщы.
Саидэ я 5-рэ классым къыщегъэжьагъэу естественнэ-хьисап шIэныгъэхэм афэщэгъагъ. Илъэс зэкIэлъыкIохэм хьисапымкIэ, биологиемкIэ, химиемкIэ, географиемкIэ Урысые олимпиадэхэм яуцугъо зэфэшъхьафхэм текIоныгъэ ыкIи хагъэунэфыкIырэ чIыпIэхэр къащихьыгъэх. КIэлэеджакIохэм апае зэхащэгъэ Урысые Сеченовскэ олимпиадэм текIоныгъэ къызэрэщыдихыгъэм ишIуагъэкIэ фэгъэкIотэнхэр иIэхэу апшъэрэ еджапIэм чIэхьагъ.
ЗыкI къэралыгъо ушэтынхэмкIэ Адыгеим анахь балл ин къизыхыгъэхэм Саидэ ащыщыгъ. УрысыбзэмкIэ балл 89-рэ, профильнэ хьисапымкIэ балл 92-рэ, биологиемкIэ — 96-рэ ыкIи химиемкIэ 97-рэ иIагъ. Дышъэ медалэу къыфагъэшъошагъэр къыгъэшъыпкъэжьыгъ.
Саидэ пшъэшъэжъые укIытапх, игъэхъагъэхэм арыкъэеу, зышIошIыжьэу щытэп. ИшIэныгъэхэм зэрахигъэхъощтым ыуж ит. Адыгеим, зыщеджэгъэ гимназием ыцIэ дахэкIэ рарегъаIо.
— СицIыкIугъом къыщегъэжьагъэу медицинэм сыфэщагъ. ЦIыфым ыпкъышъол зэрэзэхэлъыр нахь игъэкIотыгъэу зэзгъэшIэнэу сыфай. Узэу къеузын ылъэкIыщтыр, ар къызхэкIырэр, IэпыIэгъоу фэхъущтыр къэбгъотыным мэхьэнэ ин иIэу сэлъытэ. ЦIыфхэм сишIуагъэ язгъэкIынэу сыфай. Джыри лъэныкъоу зыдэзгъэзэщтыр къыхэсхыгъэп, зэкIэ сшIогъэшIэгъонэу зэсэгъашIэ. Врач дэгъу ухъуным пае лъэныкъо пстэури дэгъоу пшIэн фаеу сэлъытэ. Шъыпкъэу пIощтмэ, еджэныр къысшIокъинэп, сшIогъэшIэгъон, тезыгъэджэрэ кIэлэегъаджэхэм дэгъоу гурыIогъошIоу къытфаIуатэ, — еIо студент ныбжьыкIэм.
Непэ шIэныгъэу иIэр икIэлэегъаджэхэм яхьатырэу пшъэшъэжъыем елъытэ. Сыд фэдэ лъэныкъокIи IэпыIэгъу къызэрэфэхъугъэхэр къыхегъэщы. КIэлэегъаджэ пэпчъ екIолIэн, гумэкIэу иIэр фиIотэн амал зэриIагъэр, зыкI къэралыгъо ушэтынхэм зафигъэхьазыры зэхъум къызэрэкъоуцуагъэхэм осэ ин зэрэфишIырэр къыхигъэщыгъ. Ушэтынхэр къин къыщыхъугъэхэп, илъэс 11-м рагъэшIагъэр къыгъэлъэгъожьыгъэу елъытэ. БиологиемкIэ кIэлэегъаджэу Чэтыхъу Аидэ, химиемкIэ — Таисия Илиадис рагъэгъотыгъэ шIэныгъэхэм яшIуагъэ лъэшэу къэкIо, студент пэрытхэм ахэт. ЯтIонэрэ ным фэдэу классым ипащэу Елена Стрельниковар зэриIагъэр ыгу къэкIыжьы. Джащ фэдэу республикэ естественнэ-хьисап еджапIэм илъэс пчъагъэрэ зэрэкIуагъэр, ащ икIэлэегъаджэу Елена Татарковам къыритыгъэгъэ шIэныгъэхэр зэригъэфедэжьхэрэр къытиIуагъ.
Москва адыгэу дэсыр бэ, зэхэхьэ гъэшIэгъонэу ашIырэри макIэп, ау, гухэкIми, пшъэшъэжъыер игъо ифэрэп ахэм ахэхьанэу. Мурадэу ышIыгъэр къыдэхъуным, зисэнэхьат хэшIыкI ин фызиIэ врач дэгъу хъуным фэкIо.
ДЕЛЭКЪО Анет.