ПсэукIэ амал тэрэзхэр щыIэнхэу

Урысые Федерацием и Президентэу Владимир Путиныр кIэщакIо зыфэхъугъэ лъэпкъ проект 12-мэ япхырыщын Адыгеим щылъагъэкIуатэ.

ГущыIэм пае, «ПсэупIэр ыкIи къэлэ щыIакIэр» зыфиIорэм къыдыхэлъытагъэу икIыгъэ 2022-рэ илъэсым псэупIэ квадрат метрэ мин 468-рэ республикэм щашIи, щатыгъ. Псы къабзэ цIыфхэм аIэкIэгъэхьэгъэным фэшI ащ епхыгъэу псэолъи 7 ашIыгъ е агъэцэкIэжьыгъ, зы рагъэжьагъ.

Мы проектым къыдыхэлъытагъэу Урысыем икъэлэ цIыкIухэм яобщественнэ чIыпIэхэм язытет, ахэм язэтегъэпсыхьан пае къэралыгъо IэпыIэгъу агъо­тымэ ежьхэм яIахьэу къыхалъ­хьа­шъущтыр зэрагъапшэхи, къыхахыгъэхэм Адыгэкъалэ ахэфагъэу икIыгъэ илъэсым ахъщэ къыфатIупщыгъ. АщкIэ зыгъэпсэфыпIэ чIыпIэ дахэ щашIыгъ.

«ПсэупIэр ыкIи къэлэ щы­IакIэр» зыфиIорэ лъэпкъ проектым къыдыхэлъытагъэу Адыгеим 2022-рэ илъэсым щызэшIуахыгъэхэм пстэумкIи сомэ миллион 570,7-рэ апэIухьагъ.

— ЦIыфхэм псэукIэ ыкIи загъэпсэфын амал тэрэзхэр ятыгъэнхэр типшъэрылъ шъхьа­Iэхэм ащыщ. Общественнэ чIыпIэу зэтедгъэпсыхьащтыр республикэм исхэм къыхятэгъэ­хы, зэрэтшIыщтым тадытегущыIэ. Ащ мэхьанэ иIэу сэлъытэ — къыритхагъ АР-м и ЛIышъхьэу КъумпIыл Мурат иинтернет нэкIубгъохэм ащыщ. — «ПсэупIэр ыкIи къэлэ щыIакIэр» зыфиIорэ лъэпкъ проектым ишIуагъэкIэ, жъы хъугъэу, узщы­псэун умылъэкIыщт унэхэм ачIэсхэм ягъэкощын икIыгъэ илъэсым лъыдгъэкIотагъ, социальнэ мэхьанэ зиIэ псэолъэ зэфэшъхьафхэр тшIыгъэх. Илъэ­сэу къихьагъэми а IофшIэнхэр лъыдгъэкIотэщтых.

Мы проектым ипхырыщын пае аштэгъэ шъолъыр проектэу «Iэрыфэгъу къэлэ щыIакIэ гъэ­псыгъэныр» зыфиIорэм къыдэлъытагъэу Теуцожь районым икъуаджэу Лъэустэнхьаблэ иура­мэу Лениным ыцIэ зыхьырэм фэтэрыбэу зэхэт унэу тет­хэм ащыщхэм ящагу изэтегъэпсыхьан гъэрекIо рагъэ­жьагъ. Апэрэ чэзыум къыдыхэлъытагъэу ащ лъэсрыкIо гъогухэр фашIыгъэх, тIысыпIэхэр, къэзыгъэнэфырэ пкъыгъохэр щагъэуцугъэх. Джы мыгъэ ятIонэрэ чэзыоу автомобиль уцупIэхэр, кIэлэцIыкIу джэгупIэхэр щагъэ­псыщтых, цIыфхэм гыкIыгъэхэр зыщагъэгъушъыжьыщтхэр ща­гъэу­цущтых, площадкэ пэпчъ къашIыхьащт.

Зыгъэхьазырыгъэр
ХЪУТ Нэфсэт.