Спортзалри хэхьагъ

Кощхьэблэ районым ит къутырэу Казенно-Кужорскэм игурыт еджапIэу N 12-м щашIыгъэ спортзалыр амыгъэкощырэ мылъкум и ЗыкI къэралыгъо реестрэ хэхьагъ.

— Ащ ищыкIэгъэ пстэур охътэ кIэкIым хьазыр хъугъэ, — къы­Iуагъ «Росреестрэм» АР-мкIэ и ГъэIорышIапIэ ипащэу Марина Никифоровам. — Спортым епхыгъэ инфраструктурэм зиушъомбгъумэ, цIыфэу ащ пыщагъэм ипчъагъэ хэхъощт, япсауныгъэкIэ шIуагъэ къэзытырэм нахь зыфагъэзэщт.

Спортзалыр «Къоджэ псэу­пIэхэм зыпкъ итэу хэхъоныгъэхэр ягъэшIыгъэнхэр» зыфиIорэ къэралыгъо программэм къыщыдэлъытагъэу ашIыгъ. ПстэумкIи квадратнэ метрэ 679,1-рэ мэхъу, нэбгырэ 40-м телъытагъ.

— Адыгеим цIыфхэм япсауныгъэкIэ шIуагъэ къэзыхьыщт спортым нахьыбэу пыщагъэ хъунхэм фытегъэпсыхьэгъэ IофшIэнхэр щылъагъэкIуатэх. Мары Казенно-Кужорскэм щыпсэухэрэми лъэхъаным диштэу зэтегъэпсыхьэгъэ спорт псэуалъэ яIэ хъугъэ, — къыIуагъ «Роскадастрэм» и Къутамэу АР-м щыIэм ипащэу ХъокIо Аюбэ.

Сэкъатныгъэ зиIэу, зекIоныр къызфэкъинхэми спортзалыр агъэфедэшъуным ищыкIагъэхэри къыдалъытэзэ псэуалъэр ашIыгъ.