Адыгэ Республикэм и ЛIышъхьэу КъумпIыл Мурат Теуцожь районым зэкIом, интернет-тучанэу «Озон» илогистическэ гупчэрэ компание-дискаунтерэу «Чижик» зыфиIорэм игупчэрэ яшIын тегъэпсыхьэгъэ инвестиционнэ проектхэр зэрагъэцакIэрэм нэIуасэ зыфишIыгъ.
Iофтхьабзэм хэлэжьагъэх Адыгэ Республикэм ифедеральнэ инспектор шъхьаIэу Сергей Дрокиныр, АР-м экономикэ хэхъоныгъэмрэ сатыумрэкIэ иминистрэу Шэуджэн Заур, компаниеу «Ромекс» ипрезидентэу Алексей Прокопенкэр, муниципальнэ образованием ипащэ.
Квадрат метрэ мини 107,9-рэ зиинэгъэ псэуалъэр паркэу «Ромекс-Теучежский» зыфиIорэм щагъэпсы.
Шъугу къэтэгъэкIыжьы АР-м иминистрэхэм я Кабинетрэ пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Озон Адыгея» зыфиIорэмрэ ащ фэдэ гъэтIылъыпIэ республикэм щышIыгъэным епхыгъэ зэзэгъыныгъэ гъэрекIо зэрэзэдашIыгъэр. Инвестиционнэ проектым ипхырыщын сомэ миллиарди 6,1-м ехъу пэIухьащт. Проектым ыпкъ къикIыкIэ IофшIэпIэ чIыпIэкIэ минитIум нэс щыIэ хъущт.
Апэрэ чэзыум къыдыхэлъытагъэу гъэрекIо сомэ миллиарди 4,6-рэ къызфагъэфедагъ. Мы илъэсым ишышъхьэIу мазэ ятIонэрэ чэзыум фежьэнхэу рахъухьэ. Компанием къэралыгъо IэпыIэгъу зэрэрагъэгъотырэ программэм диштэу апэрэ чэзыумкIэ инфраструктурэ псэуалъэхэм ягъэпсын мылъкоу пэIуагъэхьагъэм щыщэу сомэ миллион 283-рэ къафызэкIагъэкIожьыгъ.
Компаниеу «Ромекс» ипащэ къызэриIуагъэмкIэ, непэ ехъулIэу проектыр зэхагъэуцогъах, ар экспертизэ ашIыгъ, апэрэ корпусымрэ инфраструктурэм ипсэуалъэхэмрэ агъэпсыгъэх, гупчэм къекIолIэрэ гъогухэр ашIыгъэх е агъэкIэжьыгъэх.
Республикэм и ЛIышъхьэ къызэрэхигъэщыгъэмкIэ, мы псэуалъэр инвестиционнэ проектхэу Урысыем экономикэ хэхъоныгъэмкIэ и Министерст-
вэ иунашъокIэ аухэсыгъэхэм ахагъэхьагъ.
— «Ромексыр» опытышхо зиIэ, IэпэIэсэныгъэшхо зыхэлъ компаниехэм ащыщ. Ащ бэшIагъэ гъусэныгъэ пытэ зыдытиIэр. Республикэм социальнэ-экономикэ хэхъоныгъэ езыгъэшIыщт инвестиционнэ проект пстэури Адыгеим ищыкIагъ. Административнэ, инфраструктурнэ Iофыгъохэм язэшIохынкIэ тэри тигъусэгъухэм сыдигъуи Iэпы-
Iэгъу тафэхъуным тыфэхьазыр, — ариIуагъ КъумпIыл Мурат къэбар жъугъэм иамалхэм яIофышIэхэм.
Паркэу «Ромекс-Теучежский» зыфиIорэм джыри зы инвестиционнэ проект щагъэцакIэ. Фирмэу «Логистический центр Адыгея 3» зыфиIоу компаниеу «Ромекс» хахьэрэм дискаунтерэу «Чижик» ипроект зэхэзыгъэуцощт гупчэм ишIын фежьагъ.
Гупчэр анахьэу зыфытегъэпсыхьэгъэщтыр гъомылэпхъэ ыкIи мыгъомылэпхъэ товархэр щыIыгъыгъэнхэр ары. ПстэумкIи псэуалъэм ишIын сомэ миллиард 1,4-рэ пэIухьащт. 2022-рэ илъэсым ыкIэхэм къащегъэжьагъэу пхыращырэ проектым сомэ миллион 300-м ехъу халъхьэгъах. 2023-рэ илъэсым имэкъуогъу гупчэр зэрэщытэу атынэу рахъухьэ.
Компаниеу «Ромекс» ипащэ республикэм и ЛIышъхьэ къыфиIотагъ псэолъакIэр зэрагъэпсыщт чэзыухэм афэгъэхьыгъэу. Джащ фэдэу Адыгэкъалэ ичIыгу Iахьэу дискаунтерэу «Чижик» игупчэ иинфраструктурнэ псэуалъэхэр зыщагъэпсыщтми тегущыIагъэх.
КъумпIыл Мурат АР-м экономикэ хэхъоныгъэмрэ сатыумрэкIэ и Министерствэ ипащэ пшъэрылъ фишIыгъ компанием игъусэу Iофыгъоу къэуцухэрэр зэкIэ зэшIуихынхэу.
АР-м и ЛIышъхьэ ипресс-къулыкъу
Сурэтхэр: А. Гусев.