УФ-м и Президентэу Владимир Путиныр кIэщакIо зыфэхъугъэ лъэпкъ проектхэм ащыщэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм къыщыдэлъытэгъэ IофшIэнэу Адыгеим щызэшIуахыхэрэм яшIуагъэкIэ мы лъэныкъомкIэ цIыфхэм ярэзэныгъэ анахьыбэу къызщыраIотыкIыгъэу, ащкIэ пэрытныгъэр зыубытыгъэ шъолъырипшIым республикэр ащыщ хъугъэ.
— Мы лъэпкъ проектым ишIуагъэкIэ тигъогу системэ зэхъокIыныгъэшIухэр зэрэфэхъухэрэр нэрылъэгъу. 2022-рэ илъэсэу Адыгеим къэралыгъо гъэпсыкIэ зиIэр илъэси 100 зыщыхъугъэм анахь мэхьэнэ ин зиIэ псэуалъэхэм ащыщыр, Мыекъуапэ къэзыухьэрэ гъогоу километрэ 27-рэ хъурэр, тыухи ттIупщыгъ, — къыритхагъ АР-м и ЛIышъхьэу КъумпIыл Мурат иинтернет нэкIубгъохэм ащыщ.
Ащ ипсалъэ къызэрэщыхигъэщыгъэмкIэ, «Щынэгъончъэ ыкIи шэпхъэшIухэм адиштэрэ гъогухэр» зыфиIорэ лъэпкъ проектым къызэрэщыдэлъытагъэу икIыгъэ илъэсым Адыгеим щызэшIуахыгъэ IофшIэнхэм пстэумкIи сомэ миллиарди 5 апэIухьагъ. АщкIэ республикэм иавтомобиль гъогу Iахь 49-рэ, ар километрэ 300 зэрэхъурэр, агъэцэкIэжьыгъ е икIэрыкIэу ашIыжьыгъ, гъогурыкIоным лъыплъэнхэу камерэ 18 агъэуцугъ.
Джащ фэдэу проектым къыдэлъытэгъэ ахъщэмкIэ хьылъэзещэ автомашинэшхохэр къэзыщэчыщт псэолъитIу шъолъыр ыкIи муниципальнэ мэхьанэ зиIэ гъогухэм гъэрекIо ащагъэуцугъ. Автомобиль гъогухэр шэпхъэшIухэм адиштэу къызэтенэнхэмкIэ зишIуагъэ къэкIощтхэм ар ащыщ.
Тэхъутэмыкъое районымкIэ поселкэу Инэм икIэу къуаджэу БжыхьэкъоякIэм кIорэ гъогум фашIыгъэ зэхэкIыпIэр лъэпкъ проектым ишIуагъэкIэ аухи, икIыгъэ илъэсым атIупщыгъ, Мыекъуапэ къэзыухьэрэ гъогум иящэнэрэ чэзыу, станицэу Черниговскэм икIэу Тыгъэмыпс кIорэр, аухыгъ.
Проектым къыщыдэлъытэгъэ ахъщэмкIэ 2022-рэ илъэсым рагъэжьагъ Мыекъопэ районым истаницэу Дахъом икIэу бгы тешъоу Лэгъо-Накъэ кIорэ гъогури. Ащ нэмыкIэу лъэмыджищ республикэм щыгъэцэкIэжьыгъэ хъугъэ.
