Сомэ миллиони 181-м ехъу апэIухьагъ

Псы къабзэу цIыфхэр зэшъощтхэр ары ащ фэдиз икIыгъэ 2022-рэ илъэсым республикэм зыпэIуигъэхьагъэр.

Урысые Федерацием и Президентэу Владимир Путиныр кIэщакIо зыфэхъугъэ лъэпкъ проектхэм ащыщэу «ПсэупIэр ыкIи къэлэ щыIакIэр» зыфиIорэм ипхырыщын пае аштэгъэ шъолъыр проектэу «Псы къабзэм» къызэрэщыдэлъытагъэу, гъэрекIо псэолъи 8 Адыгеим щатыгъ. АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъыз­мэтымкIэ и Министерствэ къызэритыгъэмкIэ, ахэм сомэ миллиони 181,3-рэ атефагъ. Ащ щыщэу сомэ миллиони 179,4-р федеральнэ бюджетым къытIупщыгъ.

Псэуалъэхэр зэкIэ псы къабзэ цIыфхэм зэраIэкIэхьащтхэм епхыгъэх, ащыщхэр агъэцэкIэжьыгъэх, адрэхэр кIэу ашIыгъэх. Джы лъэпкъ проектым ишIуагъэкIэ шапхъэхэм адиштэрэ псы къабзэ аIэкIахьэ къуа­джэхэу Джэджэхьаблэ, Псэкъупсэ, Гъобэкъуае, поселкэхэу Родниковэм, Новый зыфиIорэм, къутырхэу Городскоим, Шевченкэм, станицэу Ханскэм ащыпсэухэрэм.

Министерствэм къызэритырэмкIэ, джыри мы илъэсэу къихьагъэм Iоф­шIэнхэр лъагъэкIотэщтых. Лъэпкъ ыкIи шъолъыр проектхэм къазэращыдэлъытагъэу, мыгъэ къутырэу Шевченкэм псырыкIуапIэхэм ягъэ­псын щаухыщт, къуаджэу Улапэ икIэ­рыкIэу ахэр щашIыжьыщтых.

Джащ фэдэу къуаджэу Козэт псым епхыгъэу псэолъи 5 щагъэцэкIэ­жьыщт е кIэу щашIыщт, къуаджэу Тэхъу­тэ­мыкъуае псы къычIэщыпIи 3 икIэ­рыкIэу щашIыжьыщт, Гъобэкъуае, Адыгэкъалэ ыкIи къутырэу Граж­данскэм япсы къычIэщыпIэхэр агъэ­кIэжьыщтых.

ПстэумкIи псэолъэ 13 ашIыщт е агъэцэкIэжьыщт, ахэм сомэ миллион 308,1-рэ апэIухьащт. Проектхэм къащыдэлъытэгъэ Iофхэм ягъэцэкIэн гъэтхэпэ мазэм рагъэжьэн агу хэлъ.