АР-м и ЛIышъхьэу КъумпIыл Мурат Мыекъопэ районымкIэ станицэу Дахъо пэблэгъэ ДжэгокIо гъэхъунэм зекIо-зыгъэпсэфыпIэ паркэу щагъэпсыщтым илогистикэ изегъэушъомбгъун фэгъэхьыгъэ зэIукIэр зэрищагъ.
ЗэIукIэм хэлэжьагъэх АР-м и Премьер-министрэ ипшъэрылъхэр зыгъэцакIэу КIэрэщэ Анзаур, АР-м псэолъэшIынымкIэ, транспортымкIэ, унэ-коммунальнэ, гъогу хъызмэтымкIэ иминистрэ игуадзэу Лафышъ Рэмэзан, АР-м зекIонымкIэ ыкIи зыгъэпсэфыпIэхэмкIэ и Комитет итхьаматэу Былымгъот Ибрахьим, Мыекъопэ районым ипащэу Михаил Марьиныр, энергиер аIэкIэзыгъэхьэрэ, псэолъэшI организациехэм япащэхэр.
Проектым игъэцэкIэнкIэ транспорт инфраструктурэм игъэпсын мэхьанэшхо зэриIэр КъумпIыл Мурат хигъэунэфы-кIыгъ. Этнографическэ комплексым екIолIэщт гъогумкIэ еплъыкIэ заулэ зэрэщыIэр зэIукIэм къыщынэфагъ. Ахэм игъэкIотыгъэу ахэплъагъэх. Проект организациеу пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Геоэкопроект» зыфиIорэм ипащэу Николай Амирян упчIэу къатыгъэхэм джэуап къаритыжьыгъ.
ЗекIо-рекреационнэ паркым ищыкIэгъэ инженер инфраструктурэр зэрэращэлIэщтми шъхьафэу зэIукIэм щытегущыIагъэх. ДжэгокIо гъэхъунэм электроэнергиемрэ газымрэ IэкIэзыгъэхьащтхэ сетьри агъэпсынэу рахъухьэ. Iахьзэхэлъ обществэу «Газпром газораспределение Майкоп» игенеральнэ пащэу Игорь Сырчиным къызэриIуагъэмкIэ, коммуникациехэм яшIынрэ гъогум игъэпсынрэ зэгъусэхэу ахэплъэщтых. ГазрыкIуапIэм километри 7,4-рэ фэдиз икIыхьэгъэщт.
Проектым игъэцэкIэн зыфежьэхэкIэ чIыпIэм ипланирование лъэныкъо пстэури къыдалъытэзэ зэрэзэхагъэуцон, чIыгум игъэфедэн епхыгъэ IофшIэнхэм екIолIэкIэ тэрэз къафагъотын зэрэфаер Адыгеим и ЛIышъхьэ къыхигъэщыгъ.
«ЗэкIэри зэдиштэу, зэкIужьэу щытыным пае генеральнэ планри, планировкэмкIэ проектри тэрэзэу зэхэгъэуцогъэнхэ, ДжэгокIо гъэхъунэр зэрэщытэу зекIоным фытырагъэпсыхьан фае. ЫпэкIэ плъэхэзэ планировкэр агъэпсыным мэхьанэшхо иI», — къыщиIуагъ КъумпIыл Мурат зэIукIэм.
Адыгеим и ЛIышъхьэ зэрэхигъэунэфыкIыгъэмкIэ, зи зэрымыт чIыпIэшхор планировкэ ашIы зыхъукIэ, шапхъэхэр амыукъонхэм, зыщыфэе чIыпIэхэм псэуалъэхэр ащамыгъэпсынхэм анаIэ атырагъэтын фае. Джырэ шапхъэхэм адиштэрэ хьакIэщхэмрэ лъэпкъ нэшанэ зиIэщт псэуалъэхэмрэ зыхэхьащтхэ этнографическэ комплекс зыкI агъэпсыщтыр. Ахэр чIыпIэми, чIыопсми, экологическэ шапхъэхэми адиштэнхэ фае.
«ИщыкIэгъэ логистикэр тэгъэсы: гъогур тэшIы, электричествэмрэ газымрэ чIыпIэм етэщалIэх. Инвестиционнэ площадкэ дэгъу зыдгъэпсыкIэ, зекIоу къакIорэр нахьыбэ хъущт, инвестициехэм, бюджетхэм хэбзэIахь федэу къарыхьэрэм къыхэхъощт, IофшIэпIэ чIыпIакIэхэр нахьыбэ хъущтых», — къыIуагъ АР-м и ЛIышъхьэ.
КъумпIыл Мурат къызэрэхигъэщыгъэмкIэ, ащ фэдэ инвестиционнэ площадкэхэм зекIоным нахь зырагъэушъомбгъущт, Адыгеим нахьыбэу инвестициехэр къыхалъхьанхэм, уасэу ащ къыфашIырэм зыкъиIэтыным фэIорышIэщтых.
Шъугу къэтэгъэкIыжьы зекIозыгъэпсэфыпIэ паркыр станицэу Дахъо иIэгъо-блэгъу, ДжэгокIо гъэхъунэм, псыхъоу Шъхьэгуащэ исэмэгу нэпкъ щагъэпсынэу зэрэрахъухьэрэр. ПстэумкIи гектар 75,43-рэ ащ зэлъиубытыщт. Илъэс псаум зекIохэр гъэхъунэм къэкIонхэ алъэкIыщт. КомплексыкIэр зекIоным изегъэушъомбгъун фэIорышIэщт.
АР-м и ЛIышъхьэ ипресс-къулыкъу