ХэушъхьафыкIыгъэ дзэ операцием хэлажьэхэрэм IэпыIэгъу ягъэгъотыгъэнымкIэ IофшIэным изэхэщэкIо чанхэм тыгъуасэ Адыгеим и ЛIышъхьэу КъумпIыл Мурат аIукIагъ.
Линие плъырым икIэуххэмкIэ псэупIэу Чернышевым дэсхэм шъолъырым ипащэ заIокIэм, ащ фэгъэхьыгъэу зэдэгущыIэгъу зэдыряIагъ.
Къутырым щыщ кIэлэ ныбжьыкIабэмэ Урысыем и Президент иунашъо дырагъэштагъ ыкIи хэушъхьафыкIыгъэ дзэ операцием хэлэжьэнхэу дэкIыгъэх. Ежь къутырым щыпсэухэрэр шIушIэ Iофтхьабзэхэм ахэлажьэх.
Мыщ фэдэ IофшIэнхэм ягъэзекIон Чернышевым, Джаджэм ыкIи ахэм къапэIулъ псэупIэхэм ащыпылъхэр Анастасия Ткачевамрэ Мария Назаровамрэ. Адыгеим и ЛIышъхьэу КъумпIыл Мурат зыIокIэхэм ахэм къыфаIотагъ зэшIуахырэм фэгъэхьыгъэу ыкIи къыкIэлъэIугъэх хэушъхьафыкIыгъэ дзэ операциер зыщыкIорэ чIыпIэм нагъэсын фэе псэуалъэхэм яещэлIэнкIэ IэпыIэгъу къафэхъунэу.
«ТизэдэгущыIэгъу илъэхъан гуманитар IэпыIэгъум иугъоинкIэ гъогууанэм фэгъэхьыгъэ Iофыгъохэр игъэкIоты-гъэу зэхэтфыгъэх. Мы IофшIэныр республикэм щызэтегъэуцуагъэу, пстэури «Единэ Россием» ишъолъыр къутамэ къыращалIэшъ, частхэу тынаIэ зытетхэм ящыкIагъэм елъытыгъэу анэтэгъэсых, зэпхыныгъэ адытиIэ зэпыт. Дзэм дащыгъэхэм, контракт шIыкIэкIэ кIуагъэхэм ыкIи ежь яшIоигъоныгъэкIэ хэхьагъэхэм къатефэрэ зэтыгъо ахъщэу республикэ бюджетым къыхэкIыгъэр аIэкIэхьагъ.
Гуманитар Iофыгъошхоу республикэм зэшIуихырэм джы Чернышевым къикIырэ шIушIэри къыхэхьагъ. Къутырдэсхэм тадэIэпыIэщт «Единэ Россием», Адыгеим ибзылъфыгъэхэм я Союз Iоф адашIэнымкIэ. Къэтэджырэ Iофыгъо пстэури тызэгъусэмэ зэшIотхышъущт, хэушъхьафыкIыгъэ дзэ операцием хэлажьэхэрэми, ахэм яунагъохэми ящыкIагъэхэм ядэгъэзыжьын лъэтемытэу тынаIэ тедгъэтыщт.
Республикэм щыпсэухэу Анастасия Ткачевамрэ Мария Назаровамрэ афэдэу нэмыкIхэм афэгумэкIыхэу, IофышIухэр къезыхьыжьэхэу, ячIыгогъухэм ялъэIу зыгъэцакIэхэрэм, алъэкIыщтыр зышIэхэрэм, фэдэ Iофэу ищыкIэгъэ шъыпкъэу ыкIи мэхьэнэ ин зиIэу щытым пылъхэм тхьашъуегъэпсэу ясIо сшIоигъу!» — къащитхыгъ КъумпIыл Мурат исоциальнэ нэкIубгъохэм.