Зыныбжь хэкIотагъэхэмрэ сэкъатыныгъэ зиIэхэмрэ зычIэсхэ унэ-интернатэу Мыекъуапэ дэтым иотделениякIэу «Активное долголетие» зыфиIоу нэбгырэ 250-рэ зычIэфэщтым, ЧеремушкэкIэ заджэхэрэ микрорайоным щашIырэм Адыгеим и ЛIышъхьэу КъумпIыл Мурат щыIагъ.
Ипподромым пэблагъэу ар щытыщт. Илъэсэу икIыгъэм IофшIэнхэр рагъэжьэгъагъэх, 2024-рэ илъэсым псэолъэшIыныр аухыщт.
Проектыр гъэцэкIагъэ хъуным пае федеральнэ гупчэм къикIыгъэ IэпыIэгъур Адыгеим къыIэкIэхьагъ. Урысые Федерацием и Правительствэ и Тхьаматэ игуадзэу Дмитрий Чернышенкэм, Адыгэ Республикэм ыцIэкIэ Къэралыгъо Думэм идепутатэу Владислав Резник яIэпыIэгъу хэлъэу сомэ миллион 460-рэ илъэсэу икIыгъэм Адыгеим къыIэкIэхьагъ. Федеральнэ къэралыгъо программэу «ЦIыфхэм социальнэ IэпыIэгъу ятыгъэныр» зыфиIорэм ахъщэр къыщыдыхэлъытагъэу щыт, сметнэ уасэу проектым иIэр нахьыбэ зэрэхъугъэм къыхэкIэу а ахъщэ тедзэр къыIэкIэхьагъ. Квадрат метрэ мин 21,3-рэ фэдиз хъурэ псэуалъэм ишIын пстэумкIи сомэ миллиард 1,2-рэ фэдиз пэIухьащт, республикэ бюджетым щыщэу сомэ миллион 12,4-рэ фэдиз ащ пае къыхагъэкIыгъ.
Адыгеим и ЛIышъхьэ IофшIэнхэр зэрэкIохэрэм зыщигъэгъозагъ, амал зэриIэкIэ нахь шIогъэ ин хэлъэу ахъщэр агъэфедэнэу пшъэрылъ афишIыгъ, зыныбжь хэкIотагъэхэм гупсэфыпIэ афэхъунэу, проектыр игъом агъэцэкIэнэу, социальнэ фэIо-фашIэхэм язытет нахьышIоу зэхащэнэу пшъэрылъ афи-
шIыгъ.
Адыгэ Республикэм IофшIэнымрэ социальнэ хэхъоныгъэмрэкIэ иминистрэу Мырзэ Джанбэч къызэриIуагъэмкIэ, непэкIэ зыныбжь хэкIотагъэхэмрэ сэкъатыныгъэ зиIэхэмрэ зыщаIыгъхэрэ республикэ унэ-интернатым нэбгырэ 280-рэ фэдиз чIэс. Ахэм чэщи мафи медицинэм иIофышIэхэр афэсакъых, алъэплъэх. Нэжъ-Iужъхэр зыщытезекIухьэщтхэ, зызщагъэпсэфыщт чIыпIэхэр зэтырагъэпсыхьагъэх. ОтделениякIэм ишIын хэпшIыкIэу ишIуагъэ къэкIощт зыныбжь хэкIотэгъэ цIыфхэм социальнэ фэIо-фашIэхэу афагъэцакIэхэрэр нахьышIоу зэхэщэгъэнхэмкIэ. Унэу нэбгырэ 250-м телъытагъэр джырэ уахътэм диштэрэ мебелымкIэ зэтегъэпсыхьэгъэщт, унэ хъоо-пщаухэр, спортзал, диным епхыгъэ фэIо-фашIэхэр зыщагъэцэкIэщтхэ зал ыкIи нэмыкIхэр хэтыщтых. Ахэм анэмыкIэу мастерскойхэри, творчествэм зыщыпылъыщтхэ унэхэри къыдалъытагъэх. Унэм къыпэблагъэу фонтан зыхэтыщт зыгъэпсэфыпIэ шъолъыр иIэщт, ипподромым екIурэ лъэсрыкIо гъогу цIыкIухэри фашIыщтых.
Адыгеим и ЛIышъхьэ къызэриIуагъэмкIэ, зыныбжь хэкIотагъэхэм социальнэ IэпыIэгъу ятыгъэным иIофыгъохэр УФ-м и Президентэу Владимир Путиныр кIэщакIо зыфэхъугъэ лъэпкъ проектэу «Демографиеми» къыделъытэх, федеральнэ проектэу «Тинахьыжъхэр» зыфиIорэм тегъэпсыхьагъэу ар гъэцэкIагъэ мэхъу, къэралыгъо программэу «ЦIыфхэм социальнэ IэпыIэгъу ятыгъэныр» зыфиIорэми кIуачIэ иI.
«Зыныбжь хэкIотагъэхэр жъышъхьэ мафэ хъунхэм, ящыкIэгъэ амалхэр ягъэгъотыгъэнхэм республикэм ренэу тынаIэ щатетэгъэты. ТэркIэ анахь мэхьанэ зиIэхэм ащыщ тызэрафэгумэкIырэр тинахьыжъхэм зэхашIэныр. Ащ пае Iофтхьэбзэ зэфэшъхьафхэр щыIэныгъэм щыпхырытэщых, унэ-интернатхэм япэсыгъэ щыIакIэ ахэм щаряIэнымкIэ амалэу щыIэхэр тэгъэфедэх», — къыIуагъ Адыгэ Республикэм и ЛIышъхьэу КъумпIыл Мурат.
АР-м и ЛIышъхьэ ипресс-къулыкъу
Сурэтхэр: А. Гусев.