Электроннэ шIыкIэм тетыщт

ШIокI зимыIэ медицинэ страхованиемкIэ полисыр джы электроннэ шIыкIэм тетэу къэралыгъо фэIо-фашIэхэм япортал щыбгъэпсын плъэкIыщт. Тхьапэм е пластикым тетхагъэр къыздепхьакIын ищыкIэгъэщтэп.

Урысыем цифрэ хэхъоныгъэмкIэ и Министерствэ къызэритыгъэмкIэ, ищыкIагъэ зыхъукIэ электроннэ документыр телефонымкIэ ябгъэлъэгъун плъэкIыщт. Онлайн шIыкIэм тетэу врачым дэжь зыхэптхэнэу зыхъурэм полисым икъэбар «унэе кабинетым» автомат шIыкIэм тетэу «къикIыщт».

Электроннэ шIыкIэм тетэу медицинэ полисыр бгъэпсыным пае порталэу «Госуслуги» зыфиIорэм узэрэщытхыгъэр къэушыхьатыгъэу щытын фае.

— ЦIыфым полисыр иIэу иномер «унэе кабинетым» щытхыгъэ зыхъукIэ, автомат шIыкIэм тетэу электроннэ ар мэхъу. Полисыр зимыIэм лъэIу тхылъ ытхынышъ, электроннэ шIыкIэм тетэу къыфашIыщт. Ар зы IофшIэгъу ма­фэкIэ хьазыр мэхъу. КIэлэцIыкIухэм апайи медицинэ полисыр зы мафэкIэ къафагъэпсы, ищыкIэгъэ закъор къы­зэрэхъугъэр къэзыушыхьатырэ тхы­лъыр ары, — къытыгъ цифрэ хэхъоныгъэмкIэ Министерствэм.

Полисым епхыгъэ къэбарыр, иномер, страховой компанием зэпхыныгъэ зэрэдэпшIыщтыр ыкIи поликлиникэу узэпхыгъэр «унэе кабинетым» щытхыгъэх. Джащ фэдэу ищыкIагъэ зыхъукIэ страховой компаниер, страхованиер зыщыпшIыгъэ шъолъырыр зэблэпхъунхэ, полисым ипIалъэ къызэтебгъэуцон е пыудзэжьын плъэкIыщт.