Адыгеим иныбджэгъушIу тыIукIэщт

Карелием изаслуженнэ артистэу, Москва щыпсэурэ орэдыIо цIэрыIоу Владислав Косаревым иконцерт тыгъэгъазэм и 15-м филармонием щыкIощт.

Владислав Косаревыр Адыгеим иныб­джэгъушIу. АР-м и Къэралыгъо филармоние исимфоническэ оркестрэ игъусэу Мые­къуапэ концертхэр къыщитынхэр шэнышIу фэхъугъ.

ШIэжь яIэу ныбжьыкIэхэр пIугъэнхэм, щы­Iэныгъэм идэхагъэ, шIулъэгъу къабзэм, нэмыкIхэм афэгъэхьыгъэ орэдхэр къеIох. Республикэм исимфоническэ оркестрэ ­ихудожественнэ пащэу, Урысыем, Къэбэр­тэе-Бэлъкъарым язаслуженнэ артистэу Те­мыркъэнэ Петр, оркестрэм идирижер шъхьа­Iэу, Адыгэ Республикэм изаслуженнэ артистэу Аркадий Хуснияровым, Владислав Косаревым творческэ зэпхыныгъэу зэдыряIэр щыIэныгъэм щэпытэ.

«… И снова о любви!» зыфиIорэ пчыхьэзэхахьэр гъэшIэгъон зэрэхъущтым щэч хэлъэп.

2021-рэ илъэсым В. Косаревым Мые-къуапэ къыщиIогъэ орэдхэм ащыщ КъумпIыл Къадырбэчрэ Анзорыкъо Чеславрэ зэдаусыгъэу «Адыгэ хэку» зыфиIорэр. Филармонием къыщядэIугъэхэр В. Косаревым, симфоническэ оркестрэм зэпамыгъэоу бэрэ Iэгу къафытеуагъэх. Концертыр къызаухым искусствэм иIофышIэхэр къялъэIухи, орэдыр гъогогъуитIо артистым къыIуагъ, зэхэтхэу нэпэеплъ сурэтхэр атырахыгъэх.

Концертыр лектор-музыковедэу Хьакъуй Заремэ зэрищэщт. Шъуеблагъэх пчыхьэзэхахьэм.