Паспортхэр аратыжьыгъэх

Тыгъуасэ, Урысые Федерацием и Конституцие и Мафэ, Адыгеим щыкIуагъ урысые патриотическэ Iофтхьабзэу «Тэ — Урысыем тырицIыф» зыфиIорэр.

Ащ къыдыхэлъытагъэу Адыгэ Республикэм и Правительствэ и Унэ республикэм щыщ ныбжьыкIэхэу еджэнымкIэ, творчествэмкIэ, спортымкIэ ыкIи общественнэ IофшIэнымкIэ гъэхъа­гъэхэр зышIыгъэхэм УФ-м ипаспортхэр щаратыжьыгъэх. Адыгэ Республикэм и ЛIышъхьэу КъумпIыл Мурат ыцIэкIэ кIэлэеджакIохэм афэгушIуагъ АР-м и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженец.

«Хэгъэгум икъэралыгъо мэфэкI шъхьаIэхэм зыкIэ ащыщым — Урысые Федерацием и Конституцие и Мафэ сигуапэу паспортхэр къышъосэтых. Конституциер — хэгъэгум и Закон ШъхьаIэу зэрэщытыр зэрэшъу­шIэрэм сицыхьэ телъ, нэбгырэ пэпчъ ифитыныгъэхэмрэ ишъхьа­фитыныгъэхэмрэ ягарантие ащ къеты ыкIи зэфэдэ пшъэрылъхэр зэкIэми афешIы», — къыIуагъ Владимир Свеженец ыкIи Iоф­тхьабзэм хэлажьэхэрэр хэ­гъэгушхом епэсыгъэ цIыфхэу хъун­хэу, Урысыем икультурэ бай дэдэ, лIэшIэгъубэ къызэпызычыгъэ хэбзэ шIагъохэр, текIоныгъэ­хэр, гъэхъэгъэшхохэр лъагъэ­кIотэнхэу къяджагъ.

«Тигупсэ республикэ инеущрэ мафэ шъоры зэлъытыгъэр, хэгъэгур нахь лъэш, нахь зэте­гъэпсыхьа­гъэ хъуным шъоры фэгъэзэгъэщтыр. Хэгъэгум и Президентэу Владимир Путиным къызэрэхигъэщыгъэу, Урысыем ыкIуачIэ зэ­лъытыгъэр ащ ицIыф­хэмрэ шIуагъэу яIэхэмрэ ары. Шъуиунагъо, шъу­къызщыхъугъэ лъэны­къом, зэрэ Урысыеу ятарихъ жъугъэлъапIэ. НэмыкI цIыф лъэпкъхэм къахэкIыгъэхэри, ахэм якультури лъытэныгъэ афэшъушI. Къышъу­пэблагъэхэм Iэпы­Iэгъу шъуафэхъу, шъузэде­Iэжь ыкIи шъузэкъоуцу. Шъуигухэлъхэм теубытагъэ шъухэлъэу шъуафакIу», — кIэлэеджакIо­хэм закъыфигъазэзэ къыIуагъ Владимир Свеженец.

Непэ документ шъхьаIэхэр аратыжьыгъэх Виктория Шинкаревам (Адыгэ республикэ гимназиер, къ. Мыекъуапэ), Иван Литовкиным (еджапIэу N 7-р къ. Мыекъуапэ), Джарымэ Эльнарэ (еджапIэу N 15-р, къ. Мыекъуа­пэ), Игорь Юник (еджа­пIэу N 3-р, Джэджэ район), Вероника Калининскаям (дэеу зэхэзы­хырэ ыкIи дэеу зылъэгъурэ кIэ­лэцIыкIухэр зы­чIэс Адыгэ республикэ еджэпIэ-интернатыр), Дэгъу Самирэ (еджапIэу N 2-р, Кощхьэблэ район), ЕхъулIэ Миланэ (еджапIэу N 3-р, Адыгэ­къал), Едыдж Нарт (гимназиеу N 1-р, Красногвардейскэ район), Мария Королевам (Мыекъопэ рай­онымкIэ гъэсэныгъэ зыща­рагъэ­гъотырэ гупчэу N 9-р), Вероника Ефимцевам (еджапIэу N 2-р, Шэуджэн район), Хьахъо Батырбый (еджапIэу N 5-р, п. Яблоновскэр), Кушъу Бэллэ (еджапIэу N 9-р, Теуцожь район). УФ-м ипаспорт имызакъоу, Урысые Федерацием и Конституцие зыдэт тхылъымрэ планшетымрэ шIухьафтынэу нэбгырэ пэпчъ мыщ къащаратыгъ.

Iофтхьабзэм хэлэжьагъ Адыгэ Республикэм гъэсэныгъэмрэ шIэныгъэмрэкIэ иминистрэ ип­шъэрылъхэр зыгъэцэкIэрэ Евгений Лебедевыр. Ар ныбжьыкIэхэм къафэлъэIуагъ шIоу щы­Iэр зэкIэ къадэхъунэу. КъызэрэхигъэщыгъэмкIэ, специалист дэгъухэр Адыгеим ищыкIагъэх ыкIи республикэр ныбжьыкIэхэм ащэгугъы, зыкъызэIуахынымкIэ амал зэфэшъхьафхэри арегъэгъотых.
АР-м и ЛIышъхьэ ипресс-къулыкъу