Росгвардием АР-мкIэ и ГъэIорышIапIэ ихэушъхьафыкIыгъэ отдел ипащэу, полицием иполковникэу Игорь Кучеренкэр Адыгэ къэралыгъо университетым хьисапымкIэ ыкIи компьютернэ шIэныгъэхэмкIэ ифакультет истудентхэм бэмышIэу аIукIагъ.
ИщыIэныгъэ гъогу къырыкIуагъэр студентхэм ащ къафиIотагъ, шъолъырым и Росгвардие икъулыкъушIэхэм Iофтхьабзэу зэшIуахыхэрэм, пшъэрылъэу яIэхэм ныбжьыкIэхэр ащигъэгъозагъэх. Джащ фэдэу хэушъхьафыкIыгъэ дзэ операцием фэгъэхьыгъэ къэбар нэпцIыхэр бэу къызэрекIокIыхэрэр къыIуагъ.
— Гукъау нахь мышIэми, хэушъхьафыкIыгъэ дзэ операцием имэхьанэ, ар зыкIызэхащагъэр ныбжьыкIабэмэ къагурыIорэп. Арышъ, мыщ нахь игъэкIотыгъэу тытегущыIэн, тидзэкIолIхэм лIыхъужъныгъэ зэрахьэзэ япшъэрылъхэр зэрагъэцакIэрэр, цIыф къызэрыкIохэр неонацистхэм яжъалымыгъэ зэрэщаухъумэхэрэр къыжъугурыIон фае, — къыIуагъ Игорь Кучеренкэм.
Студентхэр зыгъэгумэкIырэ упчIэхэм яджэуапхэр къулыкъушIэм аритыжьыгъ. Шъолъыр подразделением икъулыкъушIэхэм яIофшIэн зэрэзэхащэрэм, аужырэ шапхъэхэм адиштэрэ техникэу яIэм ныбжьыкIэхэр щигъэгъозагъэх.