Урысыемрэ ДНР-мрэ я ЛIыхъужъэу Владимир Жога ыцIэ къалэу Мыекъуапэ имикрорайонэу Михайловым иурамхэм ащыщ фаусыгъ. 2022-рэ илъэсым гъэтхапэм и 5-м мамыр чIыпIэрысхэр къалэм къыдащыхэ зэхъум Волновахэ дэжь ар щыфэхыгъ.
Владимир Жога 1993-рэ илъэсым жъоныгъуакIэм и 26-м Донецкэ къыщыхъугъ. 2014-рэ илъэсым хэгъэгур къэзыухъумэхэрэм ясатырэ хэуцуагъ, разведывательнэ батальонэу «Спарта» ипэщагъ.
ДНР-м идзэ къулыкъушIэхэм ащыщэу Урысые Федерацием и ЛIыхъужъыцIэ ары апэу къызфагъэшъошагъэр. Ипшъэрылъ ыгъэцакIэзэ лIыхъужъныгъэшхо зэрэзэрихьагъэм фэшI зэфэх нэуж Владимир Жога а щытхъуцIэр къыфагъэшъошагъ. 2022-рэ илъэсым гъэтхапэм и 6-м Урысые Федерацием и Президентэу Владимир Путиныр ащ фэгъэхьыгъэ унашъом кIэтхэжьыгъ.
«Владимир Жога ыцIэ Мыекъуапэ иурамхэм ащыщ фаусыгъ. А Iофтхьабзэм кIэщакIо фэхъугъэхэр республикэм иобщественнэ организациехэр ары. Сэ ахэм адезгъэштагъ. Патриот шъыпкъэхэр, тилъэхъанэ илIыхъужъхэр тыгу илъынхэм, лIыхъужъныгъэ зезыхьагъэхэм ящысэкIэ ныбжьыкIэхэр пIугъэнхэм мэхьанэшхо яI. НэмыкI зэолIхэу, тичIыпIэгъухэу хэушъхьафыкIыгъэ дзэ операцием хэлэжьагъэхэу зидзэкIолI пшъэрылъхэр щытхъу пылъэу зыгъэцэкIагъэхэм ацIэхэр ащымыгъупшэнхэм тегъэпсыхьэгъэ нэмыкI Iофтхьабзэхэри Адыгеим щызэрахьащтых», — къыIуагъ Адыгеим и ЛIышъхьэу КъумпIыл Мурат.