Бзылъфыгъэр зыщыщыр агъэунэфы

Амыгъэунэфыгъэ бзылъ­фы­гъэм ихьадэ псыхъоу Пшызэ исэмэгу нэпкъ дэжь къы­зэрэщагъотыгъэм епхыгъэу Урысыем и Следственнэ комитет иследственнэ ГъэIорышIапIэу АР-м щыIэм и Тэхъутэмыкъое межрайон следственнэ отдел уплъэ­кIунхэр регъэкIокIых.

Следствием зэригъэунэфы­гъэмкIэ, 2022-рэ илъэсым шэкIогъум и 11-м Тэхъутэмыкъое районым ит къутырэу Хомуты пэгъунэгъоу псыхъоу Пшызэ инэпкъ дэжь амыгъэу­нэфыгъэ бзылъфыгъэм ихьадэу къыщагъотыгъэм къупшъхьэ­хэм ащыщхэр щэкIэх. ПэшIорыгъэшъэу зэрагъэунэфыгъэмкIэ, хэ­кIодагъэм илъэс 25 — 30-рэ ыныбжь, джэнэ плъыжьырэ джинс шхъуантIэрэ щыгъыгъэх.

Бзылъфыгъэр зыщыщыр гъэу­нэфыгъэным фэшI генетическэ ыкIи медицинэ хьыкум экспертизэр зэхащагъ. Ащ зэфэхьысыжьэу фэхъущтым елъытыгъэу унашъо ашIыщт.
Следственнэ къулыкъум Адыгэ Республикэм ыкIи Краснодар краим щыпсэухэрэм зафегъазэ, хэкIодэгъэ бзылъфыгъэм икъэбар, ащ идунай зэрихъожьыгъэ шIыкIэм щыгъуазэ щыIэмэ макъэ къарагъэIунэу.

«ЗыгорэкIэ шъуинэIосэ бзылъ­фыгъэр бэшIагъэу шъу­мылъэгъугъэмэ ыкIи зыдэщыIэр шъумышIэмэ, зихьадэ къагъотыгъэ бзылъфыгъэм итеплъэ ар фэжъугъадэмэ, следователым ителефон номе­рэу 8-961-818-88-58-м е шъузщыпсэурэ чIыпIэм епхыгъэу Iоф зышIэрэ хэбзэухъу­мэкIо къулыкъухэм зафэжъугъаз», — къеты Урысыем и Следственнэ комитет иследственнэ Гъэ­IорышIапIэу АР-м щыIэм ипресс-къулыкъу.