Унагъоу сабый зэрысхэмрэ ныхэмрэ IэпыIэгъоу арагъэкIырэр зыфэдэр Адыгэ Республикэм и ЛIышъхьэ къыIотагъ.
Анахь анаIэ зытырагъэтыхэрэр сабыибэ зэрыс унагъохэр ары. Урысые Федерацием и Президентэу Владимир Путиным къызэрэхигъэщыгъэу, «унэгъо Iужъухэр тиобществэ щалъытэх, къэралыгъом ишIуагъэ ахэм игъорыгъоу арегъэкIы».
Адыгэ Республикэм джырэ уахътэм сабыибэ зэрыс унэгъо 7865-рэ щэпсэу, ахэм ащыщ унэгъо 5024-мэ социальнэ IэпыIэгъу зэфэшъхьафхэр арагъэгъоты. Апэрэ кIэлэцIыкIур къызэрыхъухьагъэхэм мазэ къэс аратырэ ахъщэ IэпыIэгъур унэгъо 4690-мэ аIокIэ. УрыпсэункIэ анахь ахъщэ макIэу чIыпIэм щагъэнэфагъэм фэдиз мазэ къэс афатIупщы ящэнэрэ ыкIи ащ нахьыбэ къызэрыхъухьэгъэ унагъохэм.
Ащ нэмыкIэу, ящэнэрэ кIэлэцIыкIур ыкIи нахьыбэ къызэрыхъухьэрэ унагъохэм зэтыгъо ахъщэ IэпыIэгъу къаратыным ифитыныгъэ яIэ мэхъу. А купым къыхиубытэрэмэ ыпкIэ хэмылъэу унэ зытырашIыхьащт чIыгу Iахьыр араты. Лъэпкъ проектэу «Демография» зыфиIорэм къызэрэщыдэлъытагъэу, фэгъэкIотэныгъэ зиIэ ипотекэр сабыйхэр зиIэ унагъохэм ятыгъэнымкIэ программэ гъэнэфагъэ Адыгеим щагъэцакIэ. Ащ фэгъэзагъэх акционер обществэу «ДОМ.РФ» зыфиIорэмрэ кредитнэ организациехэмрэ.
Коммунальнэ фэIо-фашIэмэ апае атырэ ахъщэм ипроцент 30-р унэгъо Iужъухэм къафырагъэгъэзэжьы, ар республикэ бюджетым къыхахы, гурыт ыкIи хэушъхьафыкIыгъэ еджапIэхэм ащеджэхэрэм агъэфедэрэ общественнэ транспортым пае ыпкIэ аIахырэп. КIэлэцIыкIумэ япсауныгъэ псыхьэгъэным игъэкIотыгъэу республикэм щыдэлажьэх. Мы илъэсыр пштэмэ, зыгъэпсэфыпIэ чIыпIэ зэфэшъхьафхэм сабый 22492-рэ ащыIагъ.
«Тэ типшъэрылъыр зэкIэ амалэу федеральнэ гупчэм къытитырэр дгъэфедэныр, ныхэмрэ сабыйхэмрэ IэпыIэгъу тафэхъуным пае социальнэ программэхэу ыкIи проектхэу щыIэхэр дгъэфедэнхэр ары», — къыIуагъ Адыгеим и ЛIышъхьэу КъумпIыл Мурат.