Адыгэ Республикэм иминистрэхэм я Кабинет изэхэсыгъо Правительствэм и Унэ щыкIуагъ. Тхьамэтагъор ащ щызэрихьагъ Адыгэ Республикэм и Премьер-министрэ ипшъэрылъхэр зыгъэцэкIэрэ КIэрэщэ Анзаур. Iофыгъо шъхьаIэхэу зытегущыIагъэхэр Адыгеим культурэмрэ зекIонымрэ зыщягъэушъомбгъугъэныр ары.
Республикэм щыкIорэ культурнэ Iофтхьабзэхэм ахэлажьэхэ-рэр нахьыбэ шIыгъэным епхыгъэу зэрахьэхэрэм афэгъэхьыгъэу къыIотагъ культурэмкIэ министрэу Аулъэ Юрэ. 2022-рэ илъэсым пыкIыгъэ мэзи 10-м къыкIоцI республикэм культурэмкIэ иучреждениехэм зэхащэгъэ Iофтхьабзэхэм нэбгырэ миллиони 4,5-м ехъу къякIолIагъ.
Лъэпкъ проектэу «Культурэм» ипшъэрылъ шъхьаIэхэм зыкIэ ащыщ республикэм щызэхащэрэ культурнэ Iофтхьабзэхэр нахьыбэ шIыгъэнхэр. Лъэпкъ проектым диштэу культурэм иорганизациехэр агъэкIэжьых, техникэм ылъэныкъокIи нахь зэтырагъэпсыхьэх. 2017-рэ илъэсым къыщегъэжьагъэу 2022-рэ илъэсым нэс республикэм культурэм иунэу 9 щагъэпсыгъ, 45-мэ игъэкIотыгъэ гъэцэкIэжьынхэр арашIылIагъэх. А уахътэм къыкIоцI модельнэ тхылъеджэпIэ 12 зэхащагъ, искусствэхэмкIэ кIэлэцIыкIу еджэпIи 7 зэтырагъэпсыхьагъ. ИгъэкIотыгъэ гъэцэкIэжьын IофшIэнхэр арашIылIагъэх Адыгэ Республикэм лъэпкъ культурэмкIэ и Гупчэ, сурэткъэгъэлъэгъуапIэм, Пушкиным ыцIэкIэ щыт унэм, Лъэпкъ музеим.
Аулъэ Юрэ къызэрэхигъэщыгъэмкIэ, культурэм иучреждениехэр гъэкIэжьыгъэнхэм епхыгъэ IофшIэныр джыри лъагъэкIотэщт. 2023 — 2024-рэ илъэсхэм Мыекъуапэ культурнэ Гупчэ щагъэпсынэу рахъухьагъ, концерт залэу «Налмэсыр» технологическэу зэтырагъэпсыхьащт. Адыгэкъалэ культурэм и Унэ щашIыщт, къуаджэхэу ХьакIэмзые, Къэбыхьаблэ ыкIи къутырэу Саратовскэм адэт унищыр агъэцэкIэжьыщт.
КультурэмкIэ учреждениехэм ящыкIэгъэ кадрэхэм ягъэхьазырын иIофыгъо хэушъхьафыкIыгъэу зэIукIэм щытегущыIагъэх.
«Адыгеим и ЛIышъхьэу КъумпIыл Мурат культурэм ихэхъоныгъэ лъэшэу ынаIэ тырегъэты. Республикэми ащ игъэкIотыгъэу щыдэлажьэх. Ау тэ типшъэрылъыр гъэпсын IофшIэным ыкIи гъэцэкIэжьыным язакъоп. Мафэ къэс культурэм иучреждениехэм Iоф ашIэным тынаIэ тетымыгъэт хъущтэп. Кадрэ дэгъухэм ягъэхьазырын иIофыгъуи мыщкIэ мэхьанэшхо иI», — къыхигъэщыгъ КIэрэщэ Анзаур.
Урысыем и Президент ипшъэрылъхэр гъэцэкIагъэ зэрэхъухэрэм, чIыпIэ зыгъэIорышIэжьыным ихэхъоныгъэкIэ Советым изэхэсыгъо къыщашIыгъэ зэфэхьысыжьхэм къатегущыIагъ финансхэмкIэ министрэу Виктор Орловыр. Муниципальнэ бюджетхэм IэпыIэгъу ятыгъэным пае 2022-рэ илъэсымкIэ республикэ бюджетым, джащ фэдэу «Адыгэ Республикэм 2023-рэ илъэсымкIэ ыкIи 2024 — 2025-рэ план чэзыухэмкIэ республикэ бюджетым ехьылIагъ» зыфиIорэ Законым ипроект къащыдалъытэ къэлэ койхэмрэ муниципальнэ районхэмрэ яхэбзэIахьхэр сомэ миллиони 5-м нэсэу нахьыбэ шIыгъэнхэм пэIухьащт ахъщэр.
Адыгэ Республикэм финансхэмкIэ иминистрэ къызэриIуагъэмкIэ, чIыпIэ бюджетхэм яхахъохэр нахьыбэ шIыгъэнхэмкIэ IофшIэным шIуагъэу къытырэм джыри нахь зыкъегъэIэтыгъэным тегъэпсыхьэгъэ Iофтхьабзэхэр зэшIуахых. Урысыем финансхэмкIэ и Министерствэ ащ епхыгъэу къызэрэхигъэщыгъэмкIэ, аужырэ илъэси 3-м хэгъэгум ишъолъыр 11-у шъолъыр мылъкум игъэзекIон нахь дэгъоу зыщызэхэщагъэхэм Адыгеир ащыщ.
Нэужым министрэхэм я Кабинет хэтхэр республикэм зекIон Iофыр зэрэщызэхэщагъэм тегущыIагъэх. Адыгэ Республикэм зекIонымкIэ ыкIи зыгъэпсэфыпIэхэмкIэ и Комитет ипащэу Былымгъот Ибрахьимэ къызэриIуагъэмкIэ, лъэпкъ проектэу «ЗекIонымрэ хьакIэзещэнымрэ» зыфиIорэм тегъэпсыхьагъэу проект заулэ Адыгеим щагъэцакIэ. ГущыIэм пае, 2022-рэ илъэсым республикэм иеджапIэхэм яя 5 — 9-рэ классхэм арыс кIэлэеджэкIо 1300-м ехъумэ социальнэ сертификатымкIэ янэ-ятэхэр ягъусэхэу къакIухьан амал яIагъ.
Ащ нэмыкIэу «Адыгэ Республикэм зекIонымкIэ инфраструктурэм хэхъоныгъэ щегъэшIыгъэныр» зыфиIорэ шъолъыр проектым диштэу кемпинги 10 шIыгъэным ыкIи псыуцупIэхэм адэжь зыгъэпскIыпIи 2 ащызэтегъэпсыхьэгъэным пае грантхэр къафыхагъэкIыгъэх.
КIэрэщэ Анзаур къызэрэхигъэщыгъэмкIэ, чIыпIэ бизнесри грант проектхэм къахэгъэлэжьэгъэн фае.
«НепэкIэ бизнес цIыкIумрэ гурытымрэ IэпыIэгъу ятыгъэнымкIэ анахь шIуагъэ къэзыхьын зылъэкIыщт амалхэм ар ащыщ. Арышъ, муниципалитетхэм япащэхэм сыкъяджэ мы IофшIэным цIыфхэр нахь чанэу къыхагъэлэжьэнхэу ыкIи грант проектхэм яIахь ахалъхьанэу», — къыхигъэщыгъ КIэрэщэ Анзаур.
Iофтхьабзэм икIэухым ведомствэхэмрэ муниципалитетхэмрэ пшъэрылъ афашIыгъ къихьащт финанс илъэсым зыфагъэхьазырынэу.
АР-м и ЛIышъхьэ ипресс-къулыкъу