Урысые зэнэкъокъоу «ТопБлог» зыфиIорэм иятIонэрэ уцугъо изэфэхьысыжьхэр мы мафэхэм къэнэфагъэх. Президент платформэу «Урысыер — амалышIухэр зыIэкIэлъ къэралыгъу» зыфиIорэм къыдыхэлъытагъэу ар зэхащагъ.
Къэралыгъом ишъолъыр 19-мэ ялIыкIо 27-мэ текIоныгъэр къыдахыгъ ыкIи хэушъхьафыкIыгъэ шIухьафтынхэр аратыгъэх. Ахэм ахэтыгъ Адыгеим икIыгъэ Ацумыжъ Адами.
Адам АР-м изаслуженнэ артист, лъэпкъ, эстраднэ орэдхэр етхых, къеIох, блогер, УФ-м итхакIохэм я Союз хэт. Компаниеу «PR CODE» зыфиIорэм икейс финалым къыщигъэлъэгъуагъ. Блогерэу, зекIоныр зикIасэу, «Звезда Дальнего Востока» зыфиIорэ премиер къызыфагъэшъошэгъэ Алексей Жирухиныр игъусэу ащ зигъэхьазырыгъ.
— «Зы псыхъом тIо ухэхьажьышъурэп» аIо, ау проектэу «ТопБлог» зыфиIорэм ятIонэрэу текIоныгъэ къыщыдэсэхы. Уасэ къызэрэтфашIыгъэм сигъэгушхуагъ. Президент платформэу «Урысыер —амалышIухэр зыIэкIэлъ къэралыгъу» зыфиIорэм ипроект щыщ сызэрэхъугъэм мэхьэнэ ин есэты. Сикомандэ хэтхэм сарэгушхо, зэрифэшъуашэу зыкъэдгъэлъэгъоным фэшI тыгу етыгъэу зыдгъэхьазырыгъ. Ящэнэрэу сыхэлэжьэщтми сшIэрэп, ау нэбгырэ пэпчъ ыкIуачIэ мы платформэм ипроектхэм къащигъэлъэгъон фаеу сэлъытэ. Проектэу «ТопБлог» зыфиIорэм ишIуагъэкIэ хэгъэгу зэфэшъхьафхэм къарыкIыгъэхэм нэIуасэ тафэхъу, Урысые Федерацием ичIыпIэ зэфэшъхьафхэр къэтэкIухьэх. Мыщ фэдэ амал къытэзытырэ зэхэщакIохэм тафэраз, — еIо Ацумыжъ Адам.
Проектым ифинал гъэшIэгъонэу кIуагъэ. ЗэлъашIэрэ блогерхэм, социальнэ медиа-платформэхэм, экспертхэм къагъэхьазырыгъэ лекциехэр, мастер-классхэр, зэдэгущыIэгъухэр афызэхащагъэх.