IофшIэпIэ чIыпIэхэр арагъэгъотых

Украинэм зэрэщыбырсырым хэти ымыгъэгумэкIын ылъэкIырэп, ащ щыпсэущтыгъэхэр илъэсиим хьазаб хэтыгъэх, жъалымыгъэшхо ахэлъэу ахэм адэпсэущтыгъэх. Нахьыбэм якIэлэцIыкIухэр къызэраухъумэщтхэм пае ашъхьэ къырахьыжьэжьи Урысыем псэупIэкIэ къэкIуагъэх, Адыгеими ригъэблэгъагъэх.

ЦIыфхэм IофшIэпIэ чIыпIэ ягъэгъотыгъэнымкIэ къэралыгъо къулыкъум и ГъэIорышIапIэу АР-м щыIэм къызэритыгъэмкIэ, 2022-рэ илъэсыр къызихьагъэм къыщегъэжьагъэу шэкIогъум и 9-м нэс Донецкэ ыкIи Луганскэ народнэ республикэхэм, джащ фэдэу Украинэм къарыкIыгъэхэу Мыекъуапэ къэкIуагъэхэм япчъа­гъэ нэбгырэ 564-рэ мэхъу. Ахэм ащыщэу 139-р кIэлэцIыкIух. УпчIэ шIыкIэм тетэу нэбгыри 186-мэ уплъэкIун Iофтхьабзэу адызэрахьагъэхэм къызэрагъэ­лъэгъуа­гъэмкIэ, 49-мэ IофшIэпIэ чIыпIэхэр ящыкIагъэх. ЗэкIэмкIи IофшIапIэ къызфагъотыгъэр нэбгырищ. Лъэныкъоу ахэр къы­зыкIэупчIэхэрэр псэолъэшIыныр, фэIо-фашIэхэм ягъэцэкIэн, медицинэм епхыгъэ IофшIапIэхэр. Адрэхэм IофшIапIэ афылъэхъух. Мы уахътэм ехъу­лIэу учетым нэбгыритIу щыт.

Частичнэ мобилизацием изэхэщэн епхыгъэу муниципальнэ образованиеу «Къалэу Мые­къуапэ» охътэ пIалъэкIэ IофшIэпIэ чIыпIэхэр ящыкIагъэхэу щагъэунэфыгъэп.

ГъэIорышIапIэм иIофышIэхэм къызэраIуагъэмкIэ, цIыфхэм IофшIэпIэ чIыпIэхэр ягъэгъотыгъэнымкIэ анахьэу гумэкIыгъо къызыпыкIыхэрэм ащыщ IэкIыбым къикIыгъэхэм Урысыем иводительскэ правэ ыкIи Iизын къязытырэ документхэр зэрямыIэхэр.

ЕтIани къэIогъэн фае, егъэзыгъэ IофкIэ зичIыгу къэзыбгынагъэхэу Адыгеим къэкIуагъэ­хэм урысые гражданствэ яIэп. А документыр щыIэ хъумэ Iоф­шIапIэхэр ягъэгъотыгъэнымкIэ гумэкIыгъо къэуцурэп, ау бэмэ мыщ фэдэ тхылъхэр яIэхэп.

Дипломхэм алъэныкъокIи гумэкIыгъохэр щыIэх. Ар зиIэхэм ащыщхэр IофшIэпIэ чIыпIэ Iухьанхэ алъэкIы, ау медицинэ ыкIи кIэлэегъэджэ сэнэхьат зиIэхэм ар къагъэшъыпкъэжьын фае. Мыхэм ыкIи нэмыкI щыкIагъэу къэуцухэрэм ядэгъэзыжьын Адыгеим игъэкIотыгъэу щыдэлажьэх.

Тхыгъэр зыщыдгъэхьазырырэ уахътэм тефэу Херсон хэкум исыгъэхэу егъэзыгъэ IофкIэ зышъхьэ къезыхьыжьэжьын фаеу хъугъэ нэбгырэ 500 фэдиз Адыгеим къэкIуагъ. ЗичIыгу къэзыбгынагъэхэу непэ Адыгеим щыIэхэм яфэIо-фашIэхэр зэрифэшъуашэу гъэцэкIэгъэнхэм, амалэу щыIэмкIэ IэпыIэгъу афэхъугъэным сыдигъуи АР-м и ЛIышъхьэ ынаIэ тет. Ахэм ящыкIэгъэ шхыныгъо стырхэр, гъомылапхъэхэр, щыгъынхэр, нэмыкI пкъыгъохэр икъу фэдизэу аIэкIэлъых, медицинэ, психологическэ ыкIи социальнэ IэпыIэгъу агъоты. Украинэм ицIыфхэр зыщыпсэухэрэ пунктхэм зэкIэми социальнэ къулыкъухэм Iоф ащашIэ, яшIуагъэ арагъэкIы ыкIи зыщыпсэунхэ алъэкIыщт чIыпIэхэр охътэ кIэкIым къыкIоцI къафагъотых. Къоджэ псэупIэхэм япащэхэр къэкIохэшъ, тхьамыкIагъо хэфэгъэ цIыфхэр зэбгыращых, нэ­ужым ахэм псэупIэхэр къафагъотых. Джащ фэдэу АР-м и ЛIышъхьэ иунашъокIэ респуб­ликэм иминистерствэхэр чIыпIэ къин ифагъэхэм алъэплъэх, фэтэр шъхьафхэр арагъэгъотых, сыд фэдэрэ лъэныкъокIи янэплъэгъу рагъэкIыхэрэп.

КIАРЭ Фатим.